सरकारने घोषणा केली, पण पैसे कधी मिळणार? 

पुणे - गेल्या दोन महिन्यांपासून धंदा बंद राहिला... जी शिल्लक होती, ती ही लॉकडाऊनच्या काळात संपली... व्यवसाय सुरू करायचा, तर पैसा कुठून आणायचा...? सरकार व्यवसाय सुरू करण्यासाठी दहा हजार रुपये देणार, असे कळले होते, पण पुढे काय झाले माहिती नाही... ही व्यथा आहे वडपावची गाडी लावणाऱ्या सावित्रीबाईंची. 

ताज्या बातम्यांसाठी डाऊनलोड करा ई-सकाळचे ऍप

सावित्रीबाई यांचे हे उदाहरण प्रातिनिधिक आहे. अशीच अवस्था शहरातील बहुतांश पथारी व्यावसायिकांची आहे. श्रीमंतांमधून आलेल्या या महामारीने तर आमचे जीवन उद्‌ध्वस्त केले आहे. कष्ट करून जी काही थोडी पुंजी जमा झाली होती ती या लॉकडाऊनच्या काळात खर्च झाली, अशी भावना अनेक पथारी- हातगाडी व्यावसायिकांनी बोलून दाखविली. उलट डोक्‍यावर नव्याने कर्ज झाले आहे. अजून किती दिवस वाट पाहणार? घरी राहिलो, तर उपाशी मरणार आणि बाहेर पडलो तर ही महामारी, अशा कात्रीत आम्ही सापडलो असल्याची भावना पथारी व्यावसायिकांनी बोलून दाखविली. 

पुण्याच्या बातम्या वाचण्यासाठी येथे ► क्लिक करा 

लॉकडाउनचा सर्वाधिक फटका शहरातील पथारी व्यावसायिकांना बसला. हातावर पोट असणाऱ्या या व्यवसायातील अनेकांची कुटुंब उद्‌ध्वस्त होण्याची वेळ आली आहे. मध्यंतरी केंद्र सरकारने पथारी-हातगाडी व्यावसायिकांना व्यवसाय सुरू करण्यासाठी दहा हजार रुपयांचे भांडवल देणार असल्याची घोषणा केली होती. त्यास दहा दिवस होऊन गेले, अद्याप ही मदत मिळालेली नाही. ती कधी आणि कशी मिळणार याची माहिती देखील पथारी व्यवसायिकांपर्यंत गेलेली नाही. त्यामुळे केंद्र सरकारची ही घोषणा सध्या तरी कागदावरच राहिली आहे. सरकार देईल तेव्हा देईल, परंतु पुन्हा व्यवसाय सुरू करून कुटुंबाची गाडी रूळावर आणण्यासाठी अनेकांनी प्रयत्न सुरू केले आहेत. त्यासाठी व्याजाने पैसे घ्यावे लागले तरी चालतील, अशा मनस्थितीपर्यंत काही पथारी व्यावसायिक आले आहेत. असे असतानाच मायबाप सरकार आता तरी लक्ष देईल, अशी भाबडी आशाही त्यांना लागून राहिली आहे. 

पिंपरी चिंचवडच्या बातम्या वाचण्यासाठी येथे ► क्लिक करा

पुणे शहरात पथारी व्यावसायिक 
नोंदणीकृत 
- 18 हजार 225 
एकूण 
- 48 हजार 

केंद्र सरकारने दहा हजाराची योजना आणली आहे. ती रक्कम तत्काळ फेरीवाल्यांच्या खात्यावर जमा करावी. ती जर खात्यावर जमा होणार नसेल, तर राज्य सरकार आणि महापालिकेने ही जबाबदारी स्वीकारून फेरीवाल्यांना पैसे उपलब्ध करून द्यावेत. 
-संजय शंके, कार्यवाह, जाणीव हातगाडी, पथारी, फेरीवाले संघटना 
 

पंतप्रधान मोदींचे आश्‍वासन आहे. मागे पंधरा लाख रुपये जमा करणार होते. अजून जमा झाले नाही. आता दहा हजार तरी जमा करणार आहेत की नाही. घोषणा तर केली आहे. मिळाले तर खरे. महापालिकेने आणि राज्य सरकारने तरी पुढाकार घेऊन ही रक्कम तत्काळ उपलब्ध करून द्यावी. 
-बाळासाहेब मोरे, सरचिटणीस, पथारी पंचायत, महाराष्ट्र