तब्बल ४७ हजार जणांवर पुणे महापालिकेकडून दंडात्मक कारवाई

पुणे - सार्वजनिक ठिकाणी थुंकणे, कचरा टाकणे व जाळणे, उघड्यावर शौचास बसणे अशा तब्बल ४७ हजार जणांवर पुणे महापालिकेकडून गेल्या वर्षभरात दंडात्मक कारवाई करण्यात आली आहे. त्यांच्याकडून तब्बल दीड कोटी रुपये दंड वसूल केल्याची माहिती घनकचरा विभागाचे प्रमुख ज्ञानेश्‍वर मोळक यांनी दिली.

ताज्या बातम्यांसाठी डाऊनलोड करा ई-सकाळचे ऍप

केंद्र सरकारच्या स्वच्छ सर्वेक्षण स्पर्धेत महापालिकेने सहभाग घेतला आहेत. त्याच्या पार्श्वभूमीवर शहरात स्वच्छता राखण्यासाठी महापालिका प्रशासनाकडून नियमांची काटेकोरपणे अंमलबजावणी करण्यात येत आहे. या नियमांनुसार सार्वजनिक ठिकाणी थुंकल्यास, घाण केल्यास, 

लघुशंका अथवा शौचास बसणाऱ्यांना जागेवरच दंड आकारण्याचे अधिकार महापालिकेला आहेत. त्यांचा वापर करून महापालिकेने दंडात्मक कारवाईला सुरुवात केली. त्यासाठी महापालिकेच्या घनकचरा विभागासह क्षेत्रीय कार्यालय स्तरावर पथके तैनात केली आहेत.
शहरातील मोठ्या सोसायट्या, आस्थापना आणि शंभर किलोपेक्षा अधिक कचरा निर्माण करणाऱ्यांनी आपल्याच परिसरात ओला व सुका कचरा जिरविण्याचे महापालिकेने आवाहन केले होते. यासाठी महापालिकेच्या वतीने प्रकल्प उभे करण्यासाठी आणि बंद पडलेले प्रकल्प पुन्हा सुरू करण्यासाठी अवधी देऊन जनजागृती केली होती. ओला कचरा प्रक्रिया करण्यासाठी तांत्रिक साहाय्य पुरविणाऱ्या विविध कंपन्याचे प्रदर्शन आयोजित केले होते.