जूनमध्ये पावसाची दडी

पुणे - तुम्हाला जाणवतंय ना पुण्यात यंदा अद्यापही पावसाला सुरवात झाली नाही! तुमचं हे निरीक्षण अगदी बरोबर आहे. कारण, गेल्या चार वर्षांतील १ ते १५ जूनदरम्यानच्या सर्वांत कमी पावसाची नोंद या वर्षी शहरात झालीय! 

अर्धा जून उलटल्यानंतरही आपण अनुभवलेल्या, ‘टिपिकल’ अशा आपल्या पुण्याच्या पावसाची आपण सगळेच आतुरतेने वाट बघतोय. पण, मॉन्सून अजूनही दक्षिण कर्नाटकमध्ये अडकलाय. अरबी समुद्रात घोंघावलेल्या ‘वायू’ चक्रीवादळाने त्याच्या प्रवासात अडथळे आणले. पण, त्याच वेळी आपल्याकडे वादळी वारा, विजांच्या कडकडाटासह दुपारनंतर बरसणाऱ्या पूर्वमोसमी पावसानेही यंदा दडी मारली.

त्यामुळे मेच्या मध्यानंतर जूनच्या सुरवातीपर्यंत बरसणाऱ्या पूर्वमोसमी पावसाच्या जेमतेम सरींनी शहर आणि परिसरात हजेरी लावली. त्यामुळे १ ते १५ जून यादरम्यान या वर्षी ४१.५ मिलिमीटर पावसाची नोंद हवामान खात्याच्या शिवाजीनगर येथील केंद्रावर झाली.

पुण्यात २०१५ मध्ये १ ते १५ जूनदरम्यान १६०.३ मिलिमीटर पावसाची नोंद झाली होती. त्यानंतर आतापर्यंत एवढ्या पावसाची नोंद झाली नसल्याची माहिती हवामान खात्यातर्फे देण्यात आली. २०१४ मध्ये जूनच्या पहिल्या पंधरवड्यात जेमतेम २२.६ मिलिमीटर पाऊस पडला होता. हा गेल्या दहा वर्षांमधील सर्वांत कमी पडलेला पाऊस आहे, असेही हवामान खात्यातर्फे सांगण्यात आले.