Sharad Pawar : शेतीसाठी कृत्रीम बुध्दीमत्तेचा अधिकाधिक वापर करणार

बारामती - शेतीसाठी कृत्रीम बुध्दीमत्तेचे तंत्रज्ञान वापरणे फायदयाचे असल्याने व्यापक प्रमाणात या तंत्रज्ञानाचा वापर शेतीसाठी करण्याचा निर्णय घेतला असून, शेतक-यांच्या शिवारापर्यंत हे तंत्रज्ञान पोहोचविण्याचा प्रयत्न सुरु केला आहे, अशी माहिती ज्येष्ठ नेते शरद पवार यांनी दिली.

बुधवारी (ता. 23) विद्या प्रतिष्ठानच्या बैठकीनंतर पत्रकारांशी संवाद साधताना त्यांनी ही माहिती दिली.

शरद पवार म्हणाले, केंद्रीय कृषीमंत्री शिवराजसिंह चौहान यांना सकाळ माध्यम समूहाचे अध्यक्ष प्रतापराव पवार दिल्लीत मंगळवारी (ता. 22) भेटले. त्यांना बारामतीतील अँग्रिकल्चरल डेव्हलपमेंट ट्रस्टने उसाच्या शेतीत या तंत्रज्ञानाचा कसा प्रभावी वापर केलेला आहे, याची माहिती दिली.

त्यानंतर या तंत्रज्ञानाचा शेतीत अधिकाधिक वापर करणे गरजेचे असल्याचे बोलून दाखवित बारामतीच्या अँग्रिकल्चरल डेव्हलपमेंट ट्रस्टकडून उसाच्या शेतीत कृत्रीम बुध्दीमत्तेचा वापर केला आहे, त्या प्रयोगाची केंद्रीय कृषीमंत्र्यांनी प्रशंसा केली.

याचे प्रयोग एक हजार शेतक-यांना सोबत घेत केलेले आहेत, आनंदाची बाब अशी आहे की शेतक-यांत या बाबत औत्सुक्य आहे. यातही उपमुख्यमंत्र्यांनी आणखी पाच पिकांचा समावेश या नवीन तंत्रज्ञानासाठी करणार आहे, असे जाहिर केले याचा आनंद आहे. याचा फायदा शेतकरी व राज्याला निश्चित चांगला होईल. या मुळे खत व पाणी या दोन्हींचीही गरज कमी लागते, खर्च कमी होऊन उत्पादन वाढते याचा हा फायदा आहे.

उन्हाळ्याचे दोन महिने अजून जायचे असल्याने शेतक-यांनीही पाण्याचा काळजीपूर्वक वापर करणे गरजेचे आहे. टंचाईची स्थिती ही काही आजची नाही, या पूर्वीही अनेकदा अशी स्थिती निर्माण झाली होती, त्या मुळे शेतकरीही परिस्थितीचे गांभीर्य ओळखून पाणी कमी वापरतील.

ठाकरेंचा विषय हा कौटुंबिक प्रश्न....

ठाकरे बंधू एकत्र येताना दिसत असल्याचे विचारल्यानंतर हा त्यांचा कौटुंबिक प्रश्न आहे, मला त्यातील फारसे काही माहिती नाही आणि मी त्यांच्याशी काही बोललोही नाही असे शरद पवार म्हणाले.