खडकीत गायरानातील मोक्‍याच्या जागा लाटल्या; अतिक्रमणे काढण्याच्या वादात रस्ते बंद 

कुरकुंभ (पुणे) : खडकी (ता. दौंड) येथील गायरान, गावठाण व शाळेच्या जागेत गावातील धनदांडगे, गावपुढाऱ्यांनी अतिक्रमण करून मोक्‍याच्या जागा लाटल्या आहेत. एकमेकांचे अतिक्रमण काढण्याच्या हेवेदाव्यातून, खासगी जागेतून जाणारे रस्ते बंद करण्यासारखे प्रकार घडल्याने सर्वसामान्यांचे गैरसोय होत आहेत. मात्र त्याकडे प्रशासन, ग्रामपंचायत व गावपुढारी दुर्लक्ष करीत असल्याची ग्रामस्थांची तक्रार आहे. 

ग्राहक खायला येईनात, बारला परवानगी द्या; व्यावसायिकांची मागणी

खडकी येथे पुणे- सोलापूर महामार्गालगत मोठे शासकीय गायरान आहे. तेथे गेल्या अनेक वर्षांपासून स्थानिक धनदांडगे व गावपुढाऱ्यांनी अतिक्रमण करून इमारती उभारल्या आहेत. त्यामधून मोठे आर्थिक उत्पन्न मिळत असल्याने उर्वरित गायरान, गावठाण व शाळेच्या जागांवरही काही धनदांडगे, पुढाऱ्यांनी नव्याने अतिक्रमण केले आहे. ही अतिक्रमणे काढण्याच्या मागणीवरून गावातील वातावरण चिघळले आहे.

ताज्या बातम्यांसाठी डाऊनलोड करा ई-सकाळचे ऍप

राजकीय हेवेदाव्यामुळे "प्रथम यांचे अतिक्रमण काढा, मग आमचे अतिक्रमण काढा,' असे ग्रामपंचायत व प्रशासनाला सांगितले जात आहे. त्यामध्ये तालुक्‍यातील राजकीय नेत्यांचा हस्तक्षेप वाढत आहे. अतिक्रमणे काढले जात नसल्याने काही ग्रामस्थांनी त्यांच्या खासगी जागेतून गावात जाणारे महत्त्वाचे रस्ते बंद केल्याने सर्वसामान्यांची गैरसोय होत आहे. याकडे प्रशासन व ग्रामपंचायत काणाडोळा करीत आहे. अतिक्रमणे काढण्यासंदर्भात ग्रामपंचायतीने नोटीस बजावूनही ठोस कारवाई होत नाही. अतिक्रमणाबाबत भेदभाव न करता शासकीय जागेतील अतिक्रमणे काढून टाकण्याची मागणी ग्रामस्थांकडून होत आहे. 

पुण्याच्या बातम्या वाचण्यासाठी येथे ► क्लिक करा

खडकी ग्रामपंचायतीचे ग्रामसेवक चंद्रकांत देवकांबळे यांच्याशी संपर्क साधला असता त्यांनी अतिक्रमण करणाऱ्या व्यक्तींना ग्रामपंचायतीने नोटीस बजावल्या असून त्यासंदर्भात तहसीलदार व गटविकास अधिकाऱ्यांना लेखी कळविले आहे. ग्रामपंचायतीची मुदत संपल्याने शासनाने प्रशासक नेमला. मात्र प्रशासकाची बदली झाल्याने नवीन प्रशासनाची नेमणूक झाल्यानंतर कारवाई केली जाईल अशी माहिती दिली.