#PMCIssue कचऱ्याची दुर्गंधी घालविण्यासाठी महापालिका काय करते पहा

पुणे - उरुळी देवाची आणि फुरसुंगी गावांच्या सीमेवर पाय ठेवताच तुमचा श्‍वास रोखला जातो, तो इथल्या कचरा डेपोतल्या कचऱ्याच्या दुर्गंधीने. ही दुर्गंधी घालविण्यासाठी महापालिका कचऱ्यावर रोज सुगंधी औषधांची फवारणी करीत आहे. यासाठी चालू वर्षात ५६ लाख रुपये खर्च करण्यात आले आहेत.

ताज्या बातम्यांसाठी डाऊनलोड करा ई-सकाळचे एप

कचरा डेपोतून येणाऱ्या दुर्गंधीने गावकऱ्यांना नकोसे झाल्याने फवारणी नेमकी औषधाची की पैशांची, हा चर्चेचा विषय ठरत आहे.

कचऱ्यावर औषध फवारणीसाठी एवढा खर्च होत नाही, अशी कबुली देत डेपोच्या आवारातील महापालिकेच्या कर्मचाऱ्यांनी प्रशासनाच्या कारभारावर बोट ठेवले आहे. त्यामुळे कचऱ्यावर औषध फवारणीच्या नावाखाली पैशांचा अपहार होत असल्याची शंका उपस्थित होत आहे. येथील डेपोच्या १६३ एकर जागेपैकी केवळ ४० एकर जागेत कचरा टाकला जातो. या जागेत रोज आठशे ते एक हजार टन कचरा टाकण्यात येतो.

आणखी वाचा - कांदा महागलाय; काय आहेत किचनमधील 'ऑप्शन्स'

ओला आणि सुका कचरा असल्याने दुर्गंधी निर्माण होते. त्यामुळे डेपोतील कर्मचाऱ्यांसह उरुळी देवाची, फुरसुंगी गावांतील लोक हैराण झाले आहेत. त्यावर उपाययोजना होत नसल्याचे गावकऱ्यांचे म्हणणे आहे.

त्यानंतर औषधफवारणी करून दुर्गंधी कमी करण्याची योजना आखण्यात आली, त्यासाठी ठेकेदार नेमला. मात्र, दुर्गंधीऐवजी लाखो रुपयांची विल्हेवाट लावली जात असल्याची वस्तुस्थिती आहे. 

आणखी वाचा - गावच कांदा-लसूण खात नाही; काय आहे कारण?

कचऱ्याच्या वाहनांसाठी लाखोंची सफाई 
डेपोत औषधफवारणी करतानाच कचरा वाहतूक करणाऱ्या वाहनांमधूनही दुर्गंधी येत असल्याचे महापालिकेच्या निदर्शनास आले. ही वाहनेही चकाचक राहावीत, यासाठी ती धुण्याची योजना राबविण्याची शक्कलही महापालिकेने लढविली आहे. ही वाहने धुण्यासाठी वर्षभरात ६३ लाख रुपये दिले आहेत. अशाच प्रकारे गेली पाच-सहा वर्षे याची बिनबोभाट बिले काढण्यात येत आहेत. 

कचऱ्यावर फवारणीसाठी खर्च (रुपयांमध्ये) 
२०१५-१६  -  २६ लाख ५२ हजार 
२०१६-१७  -  ३८ लाख ३७ हजार 
२०१७-१८  -  ५ लाख ३१ हजार 
२०१८-१९  -  ४१ लाख ४० हजार 
२०१९-२०  -  ५६ लाख 

डेपोत खूप वर्षांपासून कचरा टाकण्यात येत असल्याने दुर्गंधी येत आहे. त्यामुळे आरोग्याची समस्या उद्भवू नये, यासाठी खबरदारी म्हणून औषधफवारणी केली जाते. या कामावर पालिकेचे नियंत्रण आहे. 
- ज्ञानेश्‍वर मोळक, प्रमुख, घनकचरा व व्यवस्थापन विभाग