लांडेवाडीत मुख्यमंत्री शिंदे यांचे जोरदार स्वागत

मंचर : “शिरूर लोकसभा मतदारसंघासाठी ग्रामीण विकास, मुख्यमंत्री ग्रामसडक योजना, पीएमआरडीए, सामाजिक न्याय यासह अन्य योजनांच्या माध्यमातून निधी उपलब्ध करून दिला जाईल. आज सुचविलेल्या २५ कोटी रुपये निधीच्या कामाबाबत तसेच अन्य महत्त्वाचे प्रकल्प मार्गी लावण्यासाठी लवकरच विशेष बैठक मंत्रालयात आयोजित केली जाईल.” असे राज्याचे मुख्यमंत्री एकनाथ शिंदे यांनी सांगितले. लांडेवाडी (ता.आंबेगाव) येथे शिवसेनेचे उपनेते माजी खासदार शिवाजीराव आढळराव पाटील यांच्यासह गावकऱ्यांनी व शिवसेना कार्यकर्त्यांनी मुख्यमंत्री शिंदे व खासदार श्रीकांत शिंदे यांचे ग्रामपंचायत ते आढळराव पाटील यांच्या निवासस्थानापर्यंत बँड पथक, ढोल ताशा व डीजे लवून जोरदार स्वागत केले. आढळराव पाटील यांच्याबरोबर शिंदे यांनी भोजन घेतले.

त्यावेळी आढळराव पाटील यांनी विविध विकास कामांचे निवेदन देवून चर्चा केली. तसेच माजी आमदार (स्व) सुरेश गोरे यांनी सुचविलेल्या जागेवरच खेड पंचायत समितीचे बांधकाम होईल असे हि शिंदे यांनी सूचित केले. यावेळी कल्पना आढळराव पाटील, माजी आमदार शरद सोनावणे, अक्षय आढळराव पाटील, सरपंच अंकुश लांडे पाटील, अरुण गिरे, सुनील बाणखेले, भाऊसाहेब सावंत पाटील, शिवा राजगुरू उपस्थित होते. भैरवनाथ पतसंस्थेच्यावतीने शिवाजीराव आढळराव पाटील, उपाध्यक्ष सागर काजळे, संचालक योगेश बाणखेले, हनुमंत तागड, अशोक गव्हाणे, रमेश खरमाळे यांच्या हस्ते शिंदे यांचा सत्कार करण्यात आला. यावेळी अनेकांनी दिलेली निवेदने स्वीकारून शिंदे भीमाशंकरकडे मार्गस्थ झाले.