छत्रपती कारखान्याने २५ कोटी ४० लाख रुपये सभासदांच्या खात्यावर केले जमा

वालचंदनगर - सभासदांना शून्य टक्के व्याजाचा लाभ मिळण्यासाठी भवानीनगर (ता. इंदापूर) येथील श्री छत्रपती सहकारी साखर (Shri Chhatrapati Sugar Factory) कारखान्याने १ मार्च २५ मार्च दरम्यान गाळप झालेल्या सर्व शेतकऱ्यांच्या (Farmer) उसाचे २५ कोटी ४० लाख रुपयांचे पेमेंट (Payment) आज मंगळवार (ता. २९) रोजी सभासदांच्‍या खात्यावर (Account) जमा केल्याची माहिती छत्रपती कारखान्याचे अध्यक्ष प्रशांत काटे व उपाध्यक्ष अमोल काटे यांनी दिली.

चालू वर्षाची आर्थिक वर्षाअखेर ३१ मार्च रोजी आहे. ३१ मार्च पर्यंत बॅंका,विविध कार्यकारी सेवा संस्था यांचे पीककर्ज न भरल्यास शेतकऱ्यांना शून्य व्याजचा फायदा मिळणार नाही. शेतकऱ्यांचे नुकसान टाळण्यासाठी छत्रपती सहकारी साखर कारखान्याने १ ते २५ मार्च पर्यंत गाळप केलेल्या उसाचे प्रतिटन २२०० रुपये प्रमाणे सर्व पेमेंट सभासदांच्या खात्यावर जमा करण्याचा महत्वाचा निर्णय घेतला. यामुळे सभासदांना सहकारी सोसायट्यांकडून घेतलेल्या पीक कर्जाचे नवे-जुने करता येणार असून सभासदांचा फायदा होणार आहे. काटे यांनी सांगितले की, शेतकऱ्यांना पीक कर्जाचे ३१ मार्च पूर्वी बॅक खात्यामध्ये पैसे भरता येण्यासाठी संचालक मंडळाने निर्णय घेतला आहे.

सध्या कारखान्याचा गळीत हंगाम वेगाने सुरु असून आजपर्यंत ११ लाख ८९ हजार ५०० क्विंटल साखरेचे उत्पादन झाले आहे. साखरेचा उतारा सरासरी ११.०४ टक्के असून सहवीज निर्मिती प्रकल्पातून ५ कोटी ३७ लाख ३० हजार ८०० युनिटस् वीज निर्मिती झाली असून यापैकी ३ कोटी ४९ लाच ४७ हजार युनिटस् वीज निर्यात करणेत आली आहे. कारखान्याच्या कार्यक्षेत्रात सुमारे १ लाख २५ हजार मेट्रीक टन ऊस शिल्लक असून सभासदांच्या संपूर्ण उसाचे गाळप करणेत येणार असून सभासदांनी ऊस गाळपाची चिंता करू नये असे आवाहन काटे व पाटील यांनी केले.