पुण्यातील बाळासाहेब ठाकरे रुग्णालयात कोविड सेंटर सुरू करा; शिवसेनेची मागणी

पुणे : कोथरुडमध्ये हॅप्पी कॉलनी परिसरात दहा वर्षांपूर्वी उभारण्यात आलेल्या बिंदुमाधव बाळासाहेब ठाकरे रुग्णालयाच्या आवारात अद्यावत कोविड केअर सेंटर त्वरित उभे करण्यात यावे व नागरीकांना त्यांच्या हक्काच्या आरोग्य सुविधा पुरवून दिलासा दयावा, अशी मागणी शिवसेनेचे शहर प्रमुख गजानन थरकुडे, माजी आमदार चंद्रकांत मोकाटे तसेच प्रशांत बधे, योगेश मोकाटे यांनी महापालिकेचे आरोग्य प्रमुख डॉ. आशिष भारती यांच्याकडे एका निवेदनाद्वारे मंगळवारी केली. या रुग्णालयातील सहा मजल्याचे बांधकाम हे दहा वर्षापूर्वीच पूर्ण झाले आहे. आत्ता सध्या या रुग्णालयाच्या पहिल्या मजल्यावर बाह्यरुग्ण विभाग कार्यान्वित असून त्याद्वारे प्राथमिक उपचार सुरु आहेत. या ठिकाणी सध्या कोरोनाचे लसीकरण केंद्र सुरु आहे. तत्कालीन आमदार चंद्रकांत मोकाटे यांच्या प्रयत्नातून हे रुग्णालय डिसेंबर २०११ मध्ये सुरु करण्यात आले. या ठिकाणी अजून १२५०० चौ.फुट अद्ययावत रुग्णालय उभे रहावे म्हणून महापालिकेच्या अर्थसंकल्पातही तरतूद करण्यात आली होती. परंतु रुग्णालयाच्या वरील मजल्यावरील रुग्णालयासाठी आवश्यक त्या सेवासुविधांची कामे अद्याप पूर्ण झालेली नाहीत. त्यामुळे इतर मजले बंद स्थितीत आहे. 

हेही वाचा - आरटीईच्या २५ टक्के जागांवरील प्रवेशाची सोडत बुधवारी होणार जाहीर

या रुग्णालयात सुमारे २०० बेडसचे कोविड केअर सेंटर उभारणे शक्य आहे. ते सुरू झाल्यास कोथरूड, वारजे, कर्वेनगर या उपनगरातील नागरीकांना दिलासा मिळणार आहे. तरी त्या उर्वरित जागेचा योग्य वापर करुन रुग्णांना दिलासा द्यावा, असे शिवसेनेच्या शिष्टमंडळाने म्हटले आहे.