Pune News : वसुलीचा गोंधळ टाळण्यासाठी मिळकतकराच्या बिलाचे दोन भाग

पुणे : पुणे महापालिकेने ९७ हजार ५०० नागरिकांना मिळकतकराच्या फरकाची ४० टक्के रक्कम भरा असे अशी नोटीस दिली. पण या नागरिकांना ४० टक्के रक्कम किती आणि चालू वर्षातील कराची रक्कम किती हे समजण्यास गोंधळ होत होता. त्यामुळे आता आॅनलाइन बिलामध्ये दोन भाग करणयात आले आहेत, त्यामुळे नागरिकांना चालू वर्षातील कराची रक्कम भरून दंड टाळता येणार आहे. हे बिल महापालिकेच्या संकेतस्थळावर पाहता येईल.

महापालिकेतर्फे १९७० पासून पुणेकरांना मिळकतकरावर ४० टक्के सवलत दिली जात होत. ही सवलत रद्द करून त्याची आॅगस्ट २०१९ पासून अंमलबजावणी सुरू झाली आहे. पहिल्या टप्प्यात ज्यांची एकापेक्षा दोन घरे आहेत किंवा ज्यांनी भाडेकरू ठेवले आहेत, अशी ९५ हजार ५०० नागरिकांची ४० टक्के ही सवलत काढून घेण्यात आली.

यामध्ये नागरिकांना १० हजारापासून ते २५ हजारापेक्षा रक्कमेची थकबाकी वसूल केली जाणार जाणार आहे. नागरिकांच्या टीकेनंतर आयुक्त विक्रम कुमार यांनी ही रक्कम वसुल करण्यास स्थगिती दिली. पण मिळकतकराच्या बिलातील रक्कम किती भरायची यावरून मिळकतधारकांचा गोंधळ सुरू झाला.

हा गोंधळ कमी करण्यासाठी मिळकतधारकांना ४० टक्के वसुलीची रक्कम किती आणि चालु वर्षातील करपात्र रक्कम किती असे फरकांचे बिल www.propertytax.punecorporation.org या महापालिकेच्या संकेतस्थळावर उपलब्ध करून दिले आहे. ४० टक्केच्या वसुलीवर आयुक्तांनी स्थगिती दिली असल्याने त्या बिलावर त्या संदर्भात स्पष्ट सूचना दिली आहे.

‘‘४० टक्के वसुलीची रक्कम किती आणि चालु वर्षातील कर किती हे नागरिकांना कळावे यासाठी आॅनलाइन बिलामध्ये तशी ही रक्कम विभागून दाखविण्यात आली आहे. ४० टक्के रकमेच्या वसुलीवर सध्या स्थगिती असल्याने ती रक्कम न भरता जी चालु वर्षातील रक्कम भरता येईल.’’

-डॉ. कुणाल खेमनार , अतिरिक्त आयुक्त, महापालिका