संगीत शिक्षणासाठी तंत्रज्ञानाची मदत

पुणे  - अभिजात शास्त्रीय संगीताचा प्रसार तंत्रज्ञानामुळे होत असताना आता ते शिकण्यासाठीदेखील तंत्रज्ञान उपयोगी पडू लागले आहे. पुण्यातील एका संगणक अभियंत्याने संगीत शिक्षणासाठी वेबआधारित सॉफ्टवेअर तयार केले आहे. त्यात स्वरलिपीसह बंदिशीचा खजिना आहे.  

पुण्यातील शिवराज सावंत हे एका बहुराष्ट्रीय कंपनीत नोकरी करतात. ते तबलावादकही आहेत. त्यांनी स्वत:कडील ज्ञान आणि तंत्रज्ञानाचा संगम साधत सॉफ्टवेअर विकसित केले. ‘विश्‍वमोहिनी डॉट कॉम’ या संकेतस्थळाद्वारे ते मोफत शिक्षणासाठी खुले करून दिले आहे. 

याबाबत सावंत म्हणाले, ‘‘पाश्‍चात्त्य संगीत लेखन करून ते वाजविण्यासाठी अनेक सॉफ्टवेअर, संकेतस्थळे आहेत. तसेच, काही भारतीय शास्त्रीय संगीतासाठी असावे, या संकल्पनेतून प्रयत्न केले. गेली तीन वर्षे त्यावर काम करीत होतो.’’

सॉफ्टवेअरबद्दल ते म्हणाले, की यामध्ये आपण सूर व तबल्याच्या नोटेशन, बंदिशी लिहू शकतो. लिहिलेल्या बंदिशी भातखंडे संगीत लिपीमध्ये बघू शकतो. संकेतस्थळावर नोंदणी करून; विद्यार्थी नोटेशन पोस्टही करू शकतात. सध्या चारशेहून अधिक बंदिशी आहेत.