अष्टविनायक महागणपतीचे मंदिर दर्शनासाठी खुले

तळेगाव ढमढेरे : रांजणगाव गणपती (ता. शिरूर) येथील अष्टविनायक महागणपतीचे १७ मार्चपासून लॉकडाऊनमुळे बंद असलेले मंदिर तब्बल आठ  महिन्यांनी आज दर्शनासाठी खुले झाल्याने ग्रामस्थ, प्रवासी व भाविकांनी समाधान व्यक्त केले आहे. 

हे ही वाचा : पुण्यात मंदिराचे गाभारे भाविकांनी गजबजले; पाडव्याच्या मुहूर्तावर जल्लोषात उघडली मंदिरे 

कोरोना विषाणूला प्रतिबंध करण्यासाठी शासनाच्या नियमानुसार महागणपतीचे मंदिर दर्शनासाठी बंद ठेवण्यात आले होते. मंदिर बंद असल्याने परिसरातील दुकानदार आर्थिक संकटात सापडले होते. आज दिवाळी पाडवा व भाऊबीज या सणाच्या मुहूर्तावर मंदिर खुले केल्याने सर्वांनीच समाधान व्यक्त केले आहे. महागणपतीचे मंदिर पुणे- अहमदनगर रस्त्यावर येत असल्याने हजारो भाविक दररोज दर्शनासाठी येथे थांबतात.

श्री क्षेत्र रांजणगाव देवस्थानतर्फे दर्शनास येणाऱ्या नागरिकांसाठी नियम तयार करण्यात आले असून, दर्शनास येणाऱ्या नागरीकांची मंदिराच्या प्रवेशद्वाराजवळच थर्मल तपासणी व सॅनिटायझर करण्यात येत आहे. ट्रस्टतर्फे नागरिकांच्या दर्शनासाठी विविध सुविधा उपलब्ध करण्यात आल्या आहेत. सोशल डिस्टंसिंगचे पालन करण्यात येत आहे.

हे ही वाचा : आठ महिन्यांच्या प्रतिक्षेनंतर संत ज्ञानेश्वर महाराज समाधी मंदिराचे खुले झाले महाद्वार 

आज रांजणगाव एमआयडीसी पोलिस स्टेशनचे पोलिस निरीक्षक सुरेशकुमार राऊत यांनी मंदिर परिसराची पाहणी करून, विविध सुविधांची माहिती घेतली. सर्वांनी नियमांचे पालन करून महागणपतीच्या दर्शनाचा लाभ घेण्याचे आवाहन श्री राऊत यांनी केले आहे.