#WeCareForPune पुण्यासाठी रेल्वेची योजना नाही !

पुणे : पुणे-नाशिक रेल्वे मार्गासाठी पुणे विभागाला दोन वर्षांपूर्वी 2 हजार 25 कोटी रुपये दिले आहेत. यामध्ये यंदाच्या अर्थसंकल्पामध्ये 10 लाख रुपयांची तरतूद केली आहे. त्याअंतर्गत प्रकल्पाचे सर्वेक्षण आणि कामाला सुरवात करण्यासाठी ही तरतूद केली आहे. याशिवाय, पुणे-मिरज-लोंढा रेल्वे लाइनच्या कामासाठी 14.99 कोटी रुपये मिळाले आहेत. तसेच दौंड-मनमाड मार्गाला जोडण्यासाठी निर्माण करण्यात येत असलेल्या पुणे-दौंड कॉर्ड लाइनसाठी आठ कोटींची तरतूद केलेली आहे. या कॉर्ड लाइनमुळे मनमाडकडे जाणाऱ्या गाड्यांना दौंड जंक्‍शनला जाण्याची गरज राहणार नाही. त्यामुळे प्रवाशांचा दौंड स्थानकावरील अर्धातास वाचणार आहे. 

हडपसर सॅटेलाइट टर्मिनलच्या बांधकामासाठी दहा लाखांची तरतूद केली आहे. त्याचबरोबर पुणे स्थानकावरील प्लॅटफॉर्मच्या कामासाठी 2 कोटींची तरतूद केली आहे. पुणे-दौंड सिग्नल यंत्रणेसाठी एक कोटी 19 लाख, तर पुणे-लोणावळा दरम्यानच्या तीन व चार नंबरच्या रेल्वे लाइनसाठी 1 कोटींची तरतूद केली आहे. 
 

पायाभूत सुविधांसाठी तरतूद -

• बारामती-लोणंद मार्गासाठी 1 कोटी 
• कराड-चिपळूण मार्गासाठी 10 लाख 
• फलटण-पंढरपूर मार्गासाठी 10 लाख 
• पुणे-मिरज-लोंढा मार्गासाठी 14 कोटी 99 लाख 
• दौंड-मनमाड मार्गासाठी 20 कोटी 
• पुणे-दौंड मार्गावरील अद्ययावत सिग्नल यंत्रणेसाठी 1 कोटी 19 हजार रुपये 
• पुणे रेल्वे स्थानकातील प्लॅटफॉर्मची लांबी वाढविण्यासाठी 2 कोटी 
• पुणे-दौंड लाइनला दौंड-मनमाड लाइनशी जोडण्यासाठी 8 कोटींचा निधी 
• पुणे-दौंड मार्गावर (डाउन लाइन) सहा किमी मार्गाच्या नूतनीकरणासाठी 1.5 कोटी