पुणे : पाण्याच्या टाकीत बुडुन चिमुकल्याचा मृत्यू

पुणे : रमझान सणाच्या खरेदीसाठी आई-वडील बाहेर गेले असताना नातेवाइकांकडे सांभाळण्यासाठी ठेवलेला तीन वर्षांच्या मुलाला घरासमोर खेळताना शेजारील बांधकाम सुरू असलेल्या इमारतीच्या तळमजल्यावरील पाण्याच्या टाकीत पडल्याने आपल्याला जीव गमवावा लागला. ही दुर्दैवी घटना मंगळवारी सायंकाळी कात्रजमधील भिलारेवाडी येथे घडली. अवघ्या पंधरा दिवसांमध्येच अनधिकृत बांधकामांमुळे लहान मुलांचा पाण्याच्या टाकीत पडून मृत्यू होण्याची ही दुसरी घटना आहे. 

पिल्लू उर्फ समर सुलतान शेख (वय तीन वर्षे, रा. भिलारेडवाडी, कात्रज) असे मृत्युमुखी पडलेल्या मुलाचे नाव आहे. याप्रकरणी मुलाचे वडील सुलतान शेख (वय 28) यांनी भारती विद्यापीठ पोलिस ठाण्यात फिर्याद दिली आहे. त्यावरून बांधकाम व्यावसायिक अनिल ज्ञानदेव खोपडे याच्याविरुद्ध भारती विद्यापीठ पोलिस ठाण्यात गुन्हा दाखल करण्यात आला आहे. 

सहाय्यक पोलिस निरीक्षक एस.आर.चिवडशेट्टी यांनी दिलेल्या माहितीनुसार, रमझानचा सण असल्यामुळे फिर्यादी व त्यांच्या पत्नी मंगळवारी खरेदी करण्यासाठी लष्कर परिसरात आल्या होत्या. त्यावेळी त्यांनी त्यांचा एकुलता एक मुलगा समर यास त्यांच्या शेजारीच राहणाऱ्या फिर्यादीच्या पत्नीच्या मावशीकडे सांभाळण्यासाठी ठेवले होते.
 

दरम्यान, सायंकाळी पाच वाजण्याच्या सुमारास समर घरासमोर खेळता-खेळता शेजारीच खोपडे याच्या बांधकाम सुरू असलेल्या इमारतीच्या तळमजल्यावर गेला. तळमजल्यावरच इमारतीला पाणी पुरवठा करणारी पाण्याची टाकी उघड्या अवस्थेत होते. त्यातच तेथे अंधार असल्याने समर पाण्याच्या टाकीत पडला. फिर्यादीच्या नातेवाईक समरला पाहण्यासाठी घराबाहेर आल्या, त्यावेळी तो दिसला नाही. त्यामुळे त्यांनी तत्काळ शेजारील पाण्याच्या टाकीकडे धाव घेतली. त्यावेळी समर पाण्यात बुडाल्याचे त्यांच्या निदर्शनास आले. अन्य रहिवाशांच्या मदतीने त्यास पाण्याबाहेर काढून उपचारासाठी रुग्णालयात नेले. मात्र उपचारापूर्वीच त्याचा मृत्यू झाल्याचे डॉक्‍टरांनी घोषित केले.