मीना खोरे कृती समितीचे गुरुवारचे आंदोलन स्थगित

जुन्नर - मीना खोऱ्याच्या पाणी प्रश्नासाठी मीना खोरे संघर्ष कृती समितीच्या माध्यमातून आंदोलनाचा निर्णय घेण्यात आला होता. मात्र, आमदार अतुल बेनके यांचे आश्वासनानंतर शेतकऱ्यांचे आंदोलन स्थगित केल्याचे कृती समितीचे अध्यक्ष सुरेश शेणकर यांनी सांगितले.
पाणी प्रश्न सोडविण्यासाठी शनिवारी (ता. ९) सावरगाव (ता. जुन्नर) येथे परिसरातील एकनाथवाडी, काचळवाडी, पाबळवाडी, गाढवेवाडी, खिलारवाडी, बस्ती व वडगाव सहानी येथील उपस्थित शेतकऱ्यांनी गुरुवारपासून (ता. १४) साखळी उपोषणाचा निर्णय जाहीर केला होता.

वडज धरणातून उजव्या कालव्याद्वारे सावरगाव परिसरातील वाड्या-वस्त्यांसाठी उपसा सिंचन योजना राबवावी, ही गेल्या अनेक वर्षांपासूनची मीना खोरे संघर्ष कृती समितीची मागणी असून, यासाठी पत्रव्यवहार, आंदोलने, बैठका झाल्या. मात्र, हा प्रश्न सुटला नाही. जलसंपदामंत्री जयंत पाटील यांनी जुन्नरच्या दौऱ्‍यात कृती समितीच्या सदस्यांना लवकरच संबंधित खात्याच्या अधिकाऱ्यासमवेत बैठक घेण्याचे जाहीर आश्वासन दिले. मात्र, कार्यवाही काहीच झाली नाही. त्यामुळे आंदोलनाचा निर्णय घेण्यात आला. मात्र, आमदार बेनके हे रविवारी (ता. १०) सावरगाव येथे श्रीराम जन्मोत्सवासाठी आले असता त्यांनी, आपला प्रश्न लवकरात लवकर मार्गी लागेल; उपोषण करू नये, असे सांगितले. त्यास कृती समितीचे अध्यक्ष शेणकर यांनी सकारात्मक प्रतिसाद देत काही काळ उपोषण स्थगित केले.