आळंदीत ‘नमो भक्तिज्ञान’ उपक्रमास सुरुवात

आळंदी, ता. १८ : शालेय जीवनातील मुलांना भक्ती आणि ज्ञान यांचे शिक्षण देऊन संस्कारमय जीवन घडवण्यासाठी उपमुख्यमंत्री एकनाथ शिंदे यांच्या माध्यमातून राज्यातील ७५०० शाळा, महाविद्यालयात प्रत्यक्ष, ई प्रणालीद्वारे ऑनलाइन आध्यात्मिक शिक्षण ऐच्छिक स्वरूपात देण्यात येणार आहे.
या मध्ये राज्यातील ३५० हून अधिक ज्येष्ठ कीर्तनकारांचा समावेश असणार असल्याची माहिती शिवसेना धर्मवीर आध्यात्मिक सेनेचे प्रदेशाध्यक्ष अक्षय महाराज भोसले यांनी सांगितले. पंतप्रधान नरेंद्र मोदी यांच्या वाढदिवसाचे औचित्य साधत शिवसेना मुख्य नेते तथा उपमुख्यमंत्री एकनाथ शिंदे यांच्या प्रेरणेने, खासदार डॉ. श्रीकांत शिंदे यांच्या मार्गदर्शनाखाली, शिवसेना धर्मवीर आध्यात्मिक सेनेतर्फे ‘नमो भक्तिज्ञान’ अभियानाचे राज्यभर आयोजन केले आहे. अभियानाचा शुभारंभ मुंबईत शिंदे यांच्या हस्ते झाला असून बुधवारी (ता. १७) आळंदीत उपक्रमाची सुरवात करण्यात आली. याप्रसंगी केंद्रीय मंत्री प्रतापराव जाधव, शिवसेना आध्यात्मिक सेनेचे राज्य कार्यकारिणी सदस्य पंढरी पवार, डॉ. नारायण महाराज जाधव उपस्थित होते.
याबाबत शिवसेना धर्मवीर आध्यात्मिक सेनेचे प्रदेशाध्यक्ष अक्षयमहाराज भोसले म्हणाले, ‘‘या अभियानाच्या माध्यमातून समाजातील विविध स्तरांवर आध्यात्मिक जागृती निर्माण करण्यात येणार आहे. तसेच समाजातील सर्व घटकांना आध्यात्मिक व सांस्कृतिक ज्ञानाची जोड देत पंतप्रधान नरेंद्र मोदी यांच्या विचारधारेनुसार भारताला विश्‍वगुरू बनवण्याच्या संकल्पनेला गती देण्याचा मानस असणार आहे. शालेय जीवनात विद्यार्थ्यांना भक्ती संपदा याची माहिती व्हावी यासाठी काही दिवसातच भक्तीज्ञान नावाची मार्गदर्शनपर पुस्तिकाही देण्यात येणार आहे. यामध्ये राज्यातील नामवंत कीर्तनकार अभ्यासकांचे संत साहित्य आणि भक्ती संप्रदायावरील लेख असतील. हा अभ्यासक्रम ऑनलाइन तसेच व्यक्तिगत स्वरूपात शिकवला जाणार आहे.’’