आळंदीत पोलिस बँडद्वारे देशभक्तिपर गीते

आळंदी, ता. २८ : देशाचे लोहपुरुष सरदार वल्लभभाई पटेल यांच्या दीडशेव्या जयंतीनिमित्त पोलिस आयुक्तालय पिंपरी-चिंचवड आणि आळंदी पोलिस ठाणे यांच्या संयुक्त आणि पोलिस बँड पथकाचे आयोजन करून आळंदीतील संत ज्ञानेश्‍वर महाराज समाधी मंदिरासमोरील महाद्वारात देशभक्तिपर गीते आणि वारकरी संप्रदाय गीतांची रचना सादर केली. पोलिस बँड पथकातील सुमधुर बँडच्या वादनाने आळंदीकरांनी टाळ्यांच्या कडकडाटात दाद दिली.
पोलिस बँड पथक यांनी वेगवेगळ्या वाद्यांच्या माध्यमातून महाद्वारामध्ये देशभक्तिपर गीते सादर करताना ‘जय जय महाराष्ट्र माझा’, ‘सारे जहाँ से अच्छा’, ‘पाऊले चालती पंढरीची वाट’सारख्या अनेक भक्तिगीतांचे सादरीकरण केले. यावेळी आळंदी पोलिस ठाण्यातील वरिष्ठ पोलिस निरीक्षक भीमा नरके यांनी सर्व पोलिस बँड पथकातील वादक पोलिसांचा सन्मान केला. यावेळी आळंदीकर आणि वारकरी संप्रदायातील मंडळी उपस्थित होते.