औद्योगिक द्रुतगती महामार्ग रद्द करा

आळेफाटा, ता. १८ : प्रस्तावित पुणे- नाशिक औद्योगिक द्रुतगती महामार्ग क्रमांक ११ रद्द करण्याच्या मागणीसाठी शिष्टमंडळाने माजी केंद्रीय कृषिमंत्री शरद पवार यांची भेट घेतली.
पुणे येथील मोदीबाग या ठिकाणी पुणे- नाशिक औद्योगिक द्रुतगती महामार्ग क्रमांक ११ प्रकल्पाविरुद्ध पुणे- नाशिक औद्योगिक द्रुतगती महामार्ग शेतकरी संघर्ष समितीचे शिष्टमंडळाने शरद पवार यांची भेट घेऊन, हा प्रकल्प रद्द करावा, अशी मागणी केली. या प्रसंगी माजी सभापती दीपक औटी, अखिल भारतीय ग्राहक पंचायतीचे मध्य महाराष्ट्र अध्यक्ष बाळासाहेब औटी, शरदचंद्र पतसंस्थेचे अध्यक्ष एम. डी. घंगाळे, सुरेश औटी, मुरलीधर औटी, राजेंद्र औटी, संदीप औटी, चंद्रकांत जाधव, अनंतराव गटकळ, प्रमोद औटी, नरेंद्र गटकळ, रामदास औटी, उमेश औटी, सचिन औटी, शरद औटी, शिवाजी औटी, संतोष औटी, समीर औटी, सुनील औटी आदी उपस्थित होते.
या वेळी दिलेल्या निवेदनात म्हटले आहे की, जुना पुणे- नाशिक राष्ट्रीय महामार्ग क्रमांक ५० अस्तित्वात असून, नवीन औद्योगिक द्रुतगती महामार्गाची गरज नाही. प्रस्तावित महामार्गामुळे परिसरातील शेतकरी व अल्पभूधारक भूमिहीन व बेरोजगार बनून विस्थापित होणार आहेत. वनक्षेत्रातील पर्यावरण व जैवविविधतेला धोका आहे.
शरद पवार यांनी शिष्टमंडळाच्या भावना ऐकून घेतल्या आणि त्यांनी, शेतकरी हा कृषी जीवनाचा आत्मा आहे. या प्रकल्पांमध्ये शेतकरी उद्‍ध्वस्त होत असेल तर राज्य सरकारने सखोल अभ्यास, विचार करावा. मी स्वतः लक्ष घालून मार्ग काढणार असल्याचे आश्वासन दिले.