निमगाव सावा येथे अर्थसंकल्पावर चर्चा

बेल्हे, ता. १६ : निमगाव सावा (ता. जुन्नर) येथे दिलीप वळसे पाटील कला, वाणिज्य व विज्ञान महाविद्यालयात अर्थशास्त्र विभागाच्या वतीने, नुकतेच अर्थसंकल्प २०२३ या विषयावर परिसंवादाचे आयोजन केले होते.
परिसंवादाच्या अध्यक्षस्थानी महाविद्यालयाच्या प्राचार्या डॉ. छाया जाधव होत्या. या वेळी दत्तात्रय गोविंदराव वळसे पाटील महाविद्यालयाच्या प्रा. शामली वाव्हाळ म्हणाल्या, ‘‘अर्थसंकल्प हा विकासाभिमुख असावा त्यातून देशाच्या विकासाला योग्य दिशा आणि चालना मिळावी. अर्थसंकल्प वरून चांगला वाटतो परंतु जनतेपर्यंत पोहोचविण्यासाठी त्याची योग्य अंमलबजावणी होणे अपेक्षित आहे. दारिद्र्य, बेरोजगारी, महागाई, शेतकऱ्यांच्या समस्या कमी करणे. शाश्वत रोजगार उपलब्ध करून या तीनही क्षेत्रांच्या विकासाला चालना देणे हा अर्थसंकल्पाचा उद्देश असावा त्यातूनच खऱ्या अर्थाने देशाच्या विकासाला गती प्राप्त होईल.’’ तर ‘‘जसा देशाचा, राज्याचा अर्थसंकल्प असतो तसे विद्यार्थ्यांनीही आपल्या कुटुंबाचे अंदाजपत्रक बनवावे, त्यातून आपल्या कुटुंबाच्या वार्षिक जमाखर्चाचा ताळेबंद आपल्याला मांडता येतो.’’ असे प्रा. राहुल डोळस यांनी स्पष्ट केले.
कार्यक्रमप्रसंगी महाविद्यालयाचे माजी प्राचार्य प्रा. प्रल्हाद शिंदे, वाणिज्य विभाग प्रमुख प्रा. ज्योती गायकवाड, राज्यशास्त्र विभाग प्रमुख प्रा. सुभाष घोडे, सांस्कृतिक विभाग प्रमुख प्रा. नीलम गायकवाड, प्रा. नंदा आहेर, प्रा. आशिष गाडगे, प्रा. प्रियांका डुकरे उपस्थित होते. कार्यक्रमाचे प्रास्ताविक डॉ. दत्तात्रय चव्हाण यांनी, सूत्रसंचालन प्रा. अनिल पडवळ यांनी, तर आभार प्रा. शीतल कांबळे यांनी मानले.