निमगाव सावा येथील विद्यार्थ्यांना २ लाख १० हजार रुपये शिष्यवृत्ती

बेल्हे, ता. २१ : निमगाव सावा (ता. जुन्नर) येथील दिलीप वळसे पाटील कला, वाणिज्य व विज्ञान महाविद्यालयातील विद्यार्थ्यांना नुकतीच सावित्रीबाई फुले पुणे विद्यापीठाची एकूण २ लाख १० हजार रुपये शिष्यवृत्ती प्राप्त झाली, अशी माहिती महाविद्यालयाच्या प्राचार्य डॉ. छाया जाधव यांनी दिली.
सावित्रीबाई फुले पुणे विद्यापीठाकडून दरवर्षी महाविद्यालयीन विद्यार्थ्यांना विविध स्वरूपाची शिष्यवृत्ती दिली जाते. क्रांतिज्योती सावित्री माता फुले अर्थसाह्य योजनेच्या माध्यमातून दहा मुलींसाठी पाच हजार रुपये, लोकशाहीर अण्णा भाऊ साठे आर्थिक दुर्बल घटक विद्यार्थी अर्थसाह्य योजना २० विद्यार्थ्यांसाठी तीन हजार रुपयांप्रमाणे, राजश्री छत्रपती शाहू महाराज शिष्यवृत्ती योजना आणि महात्मा जोतिराव फुले गुणवंत विद्यार्थी सहाय्य योजनेतून सहा ते दहा हजार रुपये, अशा स्वरूपाची शिष्यवृत्ती दिली जाते. महाविद्यालयातील विद्यार्थ्यांना शैक्षणिक वर्ष २०२२-२३ मध्ये क्रांतिज्योती सावित्रीमाता फुले अर्थसाहाय्य योजनेतून गरीब होतकरू दहा विद्यार्थिनींना ५० हजार रुपये, लोकशाहीर अण्णा भाऊ साठे आर्थिक दुर्बल घटक विद्यार्थी अर्थसाह्य योजनेतून २० विद्यार्थ्यांना साठ हजार रुपये, राजर्षी छत्रपती शाहू महाराज शिष्यवृत्ती योजनेतून सहा विद्यार्थ्यांना ४८ हजार रुपये आणि महात्मा जोतिराव फुले गुणवंत विद्यार्थी साहाय्य योजनेतून आठ विद्यार्थ्यांना ५२ हजार रुपये, अशी एकूण दोन लाख दहा हजार रुपयांची शिष्यवृत्ती प्राप्त झाली.
संस्थेचे संस्थापक पांडुरंग पवार, अध्यक्ष संदीपान पवार, सचिव परेश घोडे, संस्थेच्या प्रतिनिधी कविता पवार, प्राचार्य डॉ. जाधव यांनी शिष्यवृत्ती प्राप्त विद्यार्थ्यांचे अभिनंदन केले.