रोडेवाडी फाटा येथे बसविले गतिरोधक

पारगाव, ता. २४ : आंबेगाव तालुक्याच्या पूर्व भागातून गेलेल्या बेल्हे-जेजुरी महामार्गावर वारंवार अपघात होत असल्याने हा रस्ता मृत्यूचा सापळा बनला आहे. या रस्त्यावरील रोडेवाडी फाटा येथील चौकाच्या चारही बाजूला रस्त्यावर गतिरोधक बसवावे, अशी मागणी अनिल वाळुंज यांनी केली होती. या मागणीची दखल घेत रस्त्याचे काम करणाऱ्या ठेकेदाराने तातडीने चारही बाजूंना गतिरोधक बसवले आहेत.

येथील रस्त्यांची कामे झाल्यामुळे या ठिकाणी रहदारी वाढली आहे. परिणामी, येथे दोन दिवसांपूर्वी एक भयानक अपघात झाला. त्यामुळे येथे गतिरोधक बसविण्याची मागणी जोर धरत होती. या ठिकाणी तातडीने गतिरोधक बसविले गेल्याने नागरिकांनी समाधान व्यक्त केले आहे.