पारगावात महिलांसाठी उद्यमिता विकास कार्यक्रम

पारगाव, ता. ७ : पारगाव (ता. आंबेगाव) येथे भारतीय उद्यमिता विकास संस्थान आणि अ‍ॅक्सेंचर यांच्या संयुक्त विद्यमाने, तसेच ग्रामपंचायत आणि महिला आर्थिक विकास महामंडळ, पुणे- जिज्ञासा लोकसंचालीत साधन केंद्र (मंचर) यांच्या सहकार्याने महिलांसाठी ऍग्रो मिलेट्स अँड फूड प्रोसेसिंग प्रॉडक्ट्स- मसाला प्रोसेसिंग, या विषयावर २० दिवसीय सूक्ष्म कौशल्य उद्यमिता विकास कार्यक्रम आयोजित केला आहे.
या कार्यक्रमाचे उद्‍घाटन सरपंच श्वेता ढोबळे यांच्या हस्ते झाले. यावेळी माजी उपसरपंच सचिन अस्वारे, रोहिणी देवडे, ज्येष्ठ नागरिक संघटनेचे अध्यक्ष दिगंबर आस्वारे, किसन नाना ढोबळे, शिवाजी लोखंडे, सुनील चांगण, शंकर देवडे, बजरंग देवडे, जिज्ञासा लोकसंचलित साधन केंद्राच्या व्यवस्थापिका मनिषा जारकड, रिना वायकर, सुप्रभा पिंगळे, सचिन मोरे आदी उपस्थित होते.
यावेळी बोलताना सरपंच श्वेता ढोबळे म्हणाल्या, ‘‘या उपक्रमाचा उद्देश महिलांना उद्योगातील आवश्यक कौशल्ये, साधने आणि आत्मविश्वास प्रदान करून त्यांना स्वावलंबी बनवणे हा आहे. या प्रशिक्षणाच्या माध्यमातून महिलांना स्वतःचा व्यवसाय उभारण्यास प्रोत्साहन मिळेल आणि त्या समाजाच्या आर्थिक प्रगतीत महत्त्वपूर्ण भूमिका बजावतील.’’
भारतीय उद्यमिता विकास संस्थान आणि अ‍ॅक्सेंचर यांनी पुणे जिल्ह्यातील महिला उद्योजिकांसाठी संपूर्ण पाठबळ, नावीन्यपूर्ण संधी आणि शाश्वत उद्यमशीलतेची परिसंस्था निर्माण करण्याबाबत आपली वचनबद्धता व्यक्त केली आहे. जास्तीत जास्त महिलांनी सहभाग घेऊन या प्रशिक्षणाचा लाभ घेऊन उद्योग व्यवसाय उभारावेत असे आवाहन सचिन अस्वारे यांनी केले आहे.

06408