दुचाकीला साइड न दिल्यावरून मारहाण, एकाचा मृत्यू

भुकूम, ता. ९ ः आंदगाव (ता. मुळशी) येथील तळमाळा जवळून तक्षिला नगरकडे जाणाऱ्या ठिकाणी लवासा रस्त्यावर दुचाकी गाडीस साइड दिली नाही. या कारणावरून झालेल्या मारहाणीत एकाचा मृत्यू झाला. सुभाष विठ्ठल वाघमारे (रा. तुंगी ता. मावळ) असे मृताचे नाव असून याप्रकरणी पोलिसांनी मुठा येथील तिघांना अटक केली आहे.
याबाबत पोलिसांनी दिलेली माहितीनुसार, रविवारी दुपारी फिर्यादी राजेश अंकुश कुवर (रा. लोणावळा) मृताचा मावसभाऊ आहे. दोघेजण दुचाकीवरून जात असताना आरोपी राजेंद्र जगन्नाथ मोहोळ, संग्राम सुरेश मोहोर, समीर दीपक करपे (सर्व रा. मुठा ता. मुळशी) दुचाकीवर येत होते. साइड दिली नाही या कारणावरून फिर्यादीच्या गाडीची चावी घेऊन पुढे जाण्यास अडथळा करून वाघमारे यास हाताने, लाथा बुक्याने मारहाण करून जिवे मारले. पोलिसांनी तीनही आरोपींना सोमवारी अटक केली आहे. आरोपी पकडण्याची कारवाई पोलिस निरीक्षक अशोक, सहायक पोलिस निरीक्षक श्रीकांत जाधव, हवालदार एस. नागतिलक यांनी केली आहे.