आठ लाखांचा गुटखा डिकसळ येथे जप्त

भिगवण, ता. ३१ ः येथील भिगवण पोलिसांनी डिकसळ (ता. इंदापूर) येथे केलेल्या कारवाईमध्ये महाराष्ट्र राज्यांमध्ये बंदी असलेला सुमारे आठ लाख रुपयांचा सुगंधी तंबाखू , सुपारी व गुटखा जप्त केला आहे. ही कारवाई भिगवण पोलिस ठाण्याच्या पथकाने केल्याची माहिती सहायक पोलिस निरीक्षक विनोद महांगडे यांनी दिली आहे.

या प्रकरणी येथील भिगवण पोलिस ठाण्यातील पोलिस हवालदार अन्सार कलींदर शेख यांनी भिगवण पोलिस ठाण्यामध्ये फिर्याद दाखल दिली आहे. याप्रकरणी भाऊसो किसन सकुंडे (वय. २७, रा. मदनवाडी, ता. इंदापूर) याचेविरुध्द गुन्हा दाखल केला आहे. याबाबत पोलिसांनी दिलेली माहिती अशी की, यातील आरोपीने त्याच्या ताब्यातील मारुती सुझुकी कंपनीच्या सियाज गाडीमधून सुमारे सात लाख ९७ हजार दोनशे चाळीस रुपये किमतीचा व महाराष्ट्र शासनाने प्रतिबंधित केलेल्या व जन आरोग्यास हानिकारक असलेली सुगंधी तंबाखू, सुपारी असणारी गुटखाजवळ बाळगून वाहतूक करीत असताना मिळून आला आहे.

अधिक तपास भिगवण पोलिस ठाण्याचे सहायक पोलिस निरीक्षक विनोद महांगडे यांचे मार्गदर्शनाखाली पोलिस हवालदार सई पाटील करीत आहेत.