ग्रामपंचायत कर्मचाऱ्यांचे वेतन देण्याची मागणी

भोर, ता. ३१ : तालुक्यातील ग्रामपंचायत कर्मचाऱ्यांचे मागील नऊ महिन्यांच्या फरकाचे वेतन देण्याची मागणी ग्रामपंचायत कर्मचारी संघटनेच्या वतीने करण्यात आली.
ग्रामपंचायत ५४११ युनियन संघटनेच्या पदाधिकाऱ्यांनी राज्याचे प्रकल्प उपसंचालक श्‍याम पटवारी यांची भेट घेऊन त्यांच्याशी याबाबत चर्चा केली आणि फरकाच्या वेतनासाठी वारंवार मागणी केली असल्याचे निदर्शनास आणून दिले. यामध्ये ५४११ युनियन संघटनेचे जिल्हाध्यक्ष नथू वरे, महिलाध्यक्षा शीतल मोरे, शशीकांत गाडे व बापू राजिवडे आदींचा समावेश आहे. संघटनेने सतत पाठपुरावा केल्यामुळे दिवाळीसाठी वेतन जमा झाले. परंतु, फरकाचे वतन मात्र अदा झाले नाही. यामुळे कर्मचाऱ्यांना दिवाळी साजरी करता आली नाही. शासनाकडूनन जिल्हा परिषदेकडे १६ ऑक्टोबरला निधी जिल्हा परिषदेकडे वर्ग केला आहे. परंतु जिल्हा परिषदेने त्यावर कार्यवाही केली नसल्याचे सांगितले. संघटनेच्या पाठपुराव्यामुळे जिल्हा परिषदेने भोर तालुक्यातील सुमारे २२० कर्मचाऱ्यांचे ५१ लाख रुपयांची फरकाची रक्कम २९ ऑक्टोबरला पंचायत समितीकडे पाठविली आहे. मात्र, कर्मचाऱ्यांच्या खात्यावर अद्यापही रक्कम जमा झाली नाही.

काही ग्रामपंचायत कर्मचाऱ्यांना दिवाळी बोनस मिळालेला नाही आणि नऊ महिन्यांच्या फरकाचे वेतनही दिलेले नाही. त्यामुळे ग्रामपंचायत कर्मचाऱ्यांना दिवाळी साजरी करता आली नाही. पंचायत समितीने लवकरात लवकर पैसे कर्मचाऱ्यांच्या खात्यावर जमा करावेत.
- नथू वरे, जिल्हाध्यक्ष, ५४११ युनियन संघटना