बारामती कुस्तीगीर संघाच्या अध्यक्षपदी युगेंद्र पवार

बारामती, ता. २५ ः येथील बारामती तालुका कुस्तीगीर संघाच्या अध्यक्षपदी युगेंद्र पवार यांची तर उपाध्यक्षपदी उत्कर्ष काळे यांची निवड करण्यात आली.
यावेळी सदस्य पदाच्या निवडी झाल्या. ज्येष्ठ नेते शरद पवार यांच्या अध्यक्षतेखाली महाराष्ट्र राज्य कुस्तीगीर परिषद राज्यभर देदीप्यमान कामगिरी करत आहे. यापुढेही कुस्ती क्षेत्रात भरीव काम करून राज्य व देशपातळीवर चमकतील असे मल्ल घडविण्यासाठी सर्वांना बरोबर घेऊन प्रयत्न करणार असल्याचे युगेंद्र पवार यांनी सांगितले.
सर्व सहकारी कुस्ती क्षेत्रात बारामती तालुक्याचा नावलौकिक वाढेल यासाठी सदैव प्रयत्नशील राहतील, कुस्तीगीर संघामध्ये काम करण्यासाठी सर्व स्तरातील पहिलवानांना संधी दिल्याबद्दल अध्यक्ष युगेंद्र पवार यांचे पहिलवान मंडळींनी आभार मानले. निवड करताना कुस्ती संघांचे सर्व आजी माजी पदाधिकारी ज्येष्ठ सदस्य पहिलवान उपस्थित होते.