धोकादायक झाडे उतरविण्याची मागणी

बारामती, ता. १ : पावसाळ्यात वादळी वाऱ्यांमुळे शहरात झाडे व फांद्या पडण्याच्या घटना वारंवार घडत आहेत. त्यामुळे शहरातील खूप वर्षांपूर्वीच्या झाडांचे सर्वेक्षण करून धोकादायक झाडे व फांद्या उतरविण्याची मागणी नगरपालिकेकडे नागरिक करीत आहेत. गेल्या काही दिवसांमध्ये बारामतीत जोरदार वाऱ्यामुळे अनेक झाडे उन्मळून पडली आहेत. तर, काही झाडांच्या फांद्या कोसळल्या आहेत. त्यामुळे जीवितहानी होण्यास वाहनांचेही नुकसान होण्याची भीती आहे.
बारामतीमध्ये मोठ्या उंचीची झाडे आहेत. अनेक झाडे रस्त्यांच्या कडेला असल्याने वाहनांवर झाड पडण्याची भीती सर्वाधिक आहे. त्यामुळे वर्दळीच्या रस्त्यांना प्राधान्य देत अशा ठिकाणच्या झाडांचे सर्वेक्षण करून धोकादायक झाडे उतरवून घेणे गरजेचे आहे, असे बारामतीमधील नागरिकांचे मत आहे.