बारामतीच्या नऊ जणांचा आयर्नमॅन स्पर्धेत सहभाग

बारामती, ता. ५ : बारामतीचे तब्बल नऊ जण कझाकिस्तान येथे होणाऱ्या आयर्नमॅन स्पर्धेत सहभागी होणार आहेत. बारामतीतून प्रथम आयर्नमॅन होण्याचा सन्मान प्राप्त केलेले सतीश ननवरे यांच्या मार्गदर्शनाखाली अभिषेक ननवरे हे दुसऱ्यांदा तर मयूर आटोळे, डॉ. वरद देवकाते, युसुफ कायमखानी, अवधूत शिंदे, राजेंद्र ठवरे, ओम सावळे पाटील, विपुल पटेल व दिग्विजय सावंत प्रथमच आयर्नमॅन बनण्यासाठी बाजी लावणार आहेत.
कझाकिस्तान येथे १४ ऑगस्ट रोजी ही स्पर्धा होणार आहे. बारामतीत आयर्नमॅन बनण्याची कामगिरी सतीश ननवरे यांनी केल्यानंतर त्यांच्यापासून प्रेरणा घेत अनेकांनी याचा सराव सुरु केला होता. आता एकाच वेळेस नऊ बारामतीकर पुन्हा एकदा या स्पर्धेसाठी बाजी लावत आहेत. सतीश ननवरे आतापर्यंत तीनदा आयर्नमॅन झाले आहेत. या स्पर्धेत ६५ देशातील स्पर्धक सहभागी होणार आहेत. कोल्हापूर व पुण्यापाठोपाठ आता बारामतीतूनही मोठ्या संख्येने या स्पर्धेत स्पर्धक सहभागी होत आहेत.

अशी होईल स्पर्धा
स्पर्धेमध्ये सलग चार किमी पोहणे, १८० किमी सायकलींग व त्यामागे लगेचच ४२ किमी धावणे असे तीन क्रीडा प्रकार असतात. आयर्नमॅन बनण्यासाठी हे तिन्ही क्रीडा प्रकारांचे उद्दिष्ट १६ तासात पार करायचे असते. प्रचंड मेहनत व सराव आणि शारिरिक क्षमता यासाठी गरजेची ठरते.