बारामतीत डंपरखाली १७ मेंढ्या चिरडल्या

बारामती, ता. ५ : बारामती शहरातील माळावरच्या देवीकडून इंदापूर रस्त्याकडे जाणाऱ्या रिंग रोडवर शुक्रवारी (ता. ५) दुपारी भरधाव डंपरने तब्बल १७ मेंढ्या चिरडल्या. संभाजी मोठे या मेंढपाळाच्या या मेंढ्या आहेत.
डंपर (क्र. एमएच ११ सीएच ७५११) माळावरच्या देवीलगतच्या मार्गावरून इंदापूर जोडरस्त्याकडे निघाला होता. भरधाव डंपर मेंढ्या अक्षरशः चिरडत पुढे जाऊन थांबला. सुमारे १७ मेंढ्या अपघातात चिरडल्याची माहिती मिळत आहे. याबाबत अधिकृत दुजोरा मिळालेला नाही. घटनास्थळी मेंढपाळ महिलेचा आक्रोश पाहून उपस्थितांची मने हेलावली.
या अपघातानंतर काही काळ या रस्त्यावरील वाहतूक विस्कळित झाली होती. अचानकच झालेल्या या अपघाताने तणावाचे वातावरण निर्माण झाले होते. या घटनेनंतर संबंधित मेंढपाळाला नुकसानभरपाई मिळाल्याशिवाय डंपर हलवू देणार नसल्याची भूमिका भाजपचे अभिराज देवकाते यांनी घेतली होती. या घटनेची माहिती मिळताच पोलिस निरिक्षक सुनील महाडीक हे घटनास्थळी पोहोचले.