घरफोडी प्रकरणातील चार आरोपींना बेड्या

बारामती, ता. २८ येथील भिगवण रोडवरील वंजारवाडी गावातील जगदंबा हॉटेलमध्ये झालेल्या चोरी आणि घरफोडी प्रकरणातील चार आरोपींना बारामती तालुका पोलिसांनी भोर येथून जेरबंद केले आहे. चोरट्यांनी १६ ऑक्टोबरला रात्री हॉटेल जगदंबाच्या दरवाज्याचे कुलूप तोडून घरात प्रवेश केला होता व ३२ हजार रुपयांचा मोबाईल आणि रोख रक्कम चोरून नेली होती.
या प्रकरणी विजय मोहिते यांनी बारामती तालुका पोलिस ठाण्यात फिर्याद दिली होती. फिर्यादीनंतर पोलिस निरीक्षक चंद्रशेखर यादव यांच्या मार्गदर्शनाखाली तपास पथकाने केलेल्या तपासात अनिल सुनील निकम आणि गणेश मधू निकम (दोघे रा. वडगाव डाळ, ता. भोर) यांनी त्यांच्या साथीदारांसह ही चोरी केल्याचे समोर आले. त्यानुसार पोलिसांनी भोर येथे छापा टाकून दोघांना अटक केली. चौकशीत आरोपींनी आपल्या साथीदारांची नावे रवी मंगेश जाधव आणि रवी बंडू थोरात (दोघे रा. म्हातोबानगर, मुळशी, सध्या रा. रूई, ता. इंदापूर) अशी सांगितली.
पोलिसांनी रूई येथे छापा टाकून दोघांना ताब्यात घेतले. चौकशीत त्यांनी चोरीची कबुली दिली. या आरोपींकडून चोरीस गेलेले विविध कंपन्यांचे एकूण सात मोबाईल फोन व रोख रक्कम हस्तगत करण्यात आली आहे.