खेडमध्ये माहिती अधिकार कार्यकर्त्यांचा सुळसुळाट

चाकण, ता. १६ : खेड तालुक्यात माहिती अधिकार कार्यकर्ते सध्या मोठ्या प्रमाणात वाढले आहेत. त्यातून काही अधिकारी, कर्मचाऱ्यांना ब्लॅकमेलिंगचे प्रमाण वाढले आहेत. त्यातून काही अधिकारी, कर्मचारी त्रस्त झाले आहेत. काही माहिती अधिकार कार्यकर्ते माहिती अधिकार कायद्याच्या नावाखाली महसूल विभागाचे अधिकारी, इतर शासकीय विभागाचे कर्मचारी यांना टार्गेट करत आहेत.
खेड तालुक्यात अगदी नगर जिल्ह्यातून काहीजण खेड तालुक्यातील शासकीय कार्यालयात माहिती मिळविण्यासाठी चकरा मारतात. माहिती मागवून ती कशासाठी आहे हे सांगत नाहीत. दोन, चार जण टोळक्याने शासकीय कार्यालयात येतात. अधिकाऱ्यांना, कर्मचाऱ्यांना काही विभागाची माहिती देण्यास सांगतात. ज्या विभागात काही गडबड आहे ते अधिकारी, कर्मचारी माहिती देण्यास टाळाटाळ करतात. याचा फायदा तथाकथित कार्यकर्ते घेतात.
काही आर्थिक सेटलमेंट करतात. त्यामुळे माहिती अधिकाराच्या नावाखाली काही कार्यकर्त्यांचे चांगलेच फावले आहे. तथाकथित माहिती अधिकार कार्यकर्ते स्वतःच्या फायद्यासाठी माहिती मागवितात. नियमानुसार माहिती ही समाजहितासाठी मागितली पाहिजे व ती प्रसिद्ध केली पाहिजे असा नियम असताना माहिती वैयक्तिक कारणासाठी व फायद्यासाठी मागविली जाते. त्यातून अधिकारी, कर्मचाऱ्यांना ब्लॅकमेलिंग केले जाते. दर महिन्याला ठराविक हप्ते तथाकथित माहिती अधिकाऱ्याला दिले जातात. एका शासकीय अधिकाऱ्याने नाव न छापण्याच्या अटींवर सांगितले की, ‘‘नगर जिल्ह्यातून कारने माहिती अधिकार कार्यकर्ते येतात. टोळक्याने येऊन अनेक वेळा माहिती मागवितात. वेळेत माहिती देण्याचा तगादा लावतात, ते रुबाबात वागतात व अधिकारी, कर्मचाऱ्यांवर दबाव कसा येईल हे पाहतात. त्यातून काही ब्लॅकमेलिंगचे प्रकार घडत आहेत. यावर नियंत्रण येण्याची गरज आहे.’’