आंबेगाव तालुक्यातील रेशनिंग कार्डधारकांना अडचणी

घोडेगाव, ता. २७ : आंबेगाव तालुक्यात रेशनिंग कार्ड ग्राहकांना मागील दोन ते तीन महिन्यांपासून अनेक अडचणींना सामोर जावे लागत आहे. युवा सेनेकडे त्या संबंधी तक्रार आल्या आहेत. नागरिकांची गैरसोय दूर करावी अशी लेखी मागणी आंबेगाव तालुका युवतीसेनेच्या नीलम गावडे यांनी तहसीलदारांकडे निवेदनाद्वारे केली आहे.
रेशनिंग कार्ड मधून नाव कमी करणे, नाव वाढवणे अथवा विभक्त रेशन कार्ड करणे यासाठी नागरिकांना हेलपाटे मारावे लागतात. गरीब जनतेचे प्रश्न मार्ग लागावे यासाठी नायब तहसीलदार ए. बी. गवारी यांच्याकडे युवती सेनेमार्फत निवेदन दिले. त्या वेळी युवती सेना सदस्या तसेच ग्रामपंचायत सदस्या डॉ. निलम किशोर गावडे यांनी नागरिकांची हेळसांड न थांबल्यास युवती सेना आंबेगावच्या वतीने तीव्र आंदोलन करण्यात येईल असे निवेदनात म्हटले. त्यावेळी आंबेगाव तालुक्यातील युवती सेना सदस्या माधुरी अंकुश, रूपाली अंकुश, अंकिता तोत्रे, सोनाली फदाले, साक्षी फदाले उपस्थित होत्या.