मल्हारगडावर पेटविल्या १५१ मशाली

गराडे, ता. २४ : सोनोरी (ता. पुरंदर) येथील मल्हारगड या किल्ल्यावर मल्हारगड विकास प्रतिष्ठानचे संस्थापक अध्यक्ष सतीश शिंदे यांनी दिवाळी पाडवा कार्यक्रम केला. मागील अनेक वर्षापासून गड संवर्धन, वृक्षारोपण, दिवाळी पाडवा असे कार्यक्रम गडावर शिंदे करत आहेत. यावर्षी १५१ मशाली गडाच्या तटबंदीवर पेटविल्या.
पाडव्यानिमित्त महादेव मंदिर, खंडोबा मंदिर, छत्रपती शिवाजी महाराज यांच्या पुतळ्याची पूजा करून रांगोळ्या काढून व फुलांची सजावट करून तसेच गडाचा महादरवाजा या ठिकाणी तोरण बांधण्यात आले. तसेच गडावर पणत्या लावुन त्या तळ्यातील पाण्यामध्ये सोडल्या. गडावर फटाक्यांची आतषबाजी करीत गडप्रेमींनी दिवाळीचा आनंद लुटला. हा सर्व कार्यक्रम पहाटे चार वाजता करण्यात आला. यामध्ये विजय शिंदे, विकास शिंदे, नीलेश शिंदे, हिमेश शिंदे, सुनील काळे, विशाल वायकर, कुंजीरवाडीचे शिवप्रेमी उपस्थित होते. श्रेयस शिंदे या लहान मुलाने शिवाजी महाराजांची गारद दिली.