इंदापुरात बेशिस्त चालकांवर कारवाई

इंदापूर, ता. १८ : इंदापूर शहरात वारंवार होत असलेल्या वाहतूक कोंडीच्या पार्श्वभूमीवर बेशिस्त पार्किंग आणि वाहतुकीचे नियम मोडणाऱ्या वाहनांवर इंदापूर पोलिसांनी धडक कारवाई केली असून, ४६ वाहनांवर ३७ हजार ५०० रुपयांची दंडात्मक कारवाई करण्यात आली.
इंदापूर शहरातील बाबा चौक, न्यायालय समोरील चौक, बस स्थानक परिसर, इंदापूर महाविद्यालयासमोर, तसेच बाजारपेठेतील महत्त्वाच्या भागांमध्ये वाहतुकीचे नियम पाळले जात नसल्याने गेल्या काही दिवसांपासून वारंवार वाहतूक कोंडी होत आहे. याचा फटका सर्वसामान्य नागरिकांना सहन करावा लागत आहे. या पार्श्वभूमीवर गुरुवारी (ता. १८) पोलिस निरीक्षक सूर्यकांत कोकणे यांच्यासह पोलिस उपनिरीक्षक हनुमंत वाघमारे, पोलिस कर्मचारी सचिन बोराडे, सूरज कदम, प्रमोद भोसले, प्रशांत साळवे, वाहतूक पोलिस सुहास आरणे, पद्मसिंह शिंदे, अनिल नागरगोजे, अमोल खाडे, अकबर शेख आणि शोभा खरात यांनी वाहतुकीचे नियम मोडणाऱ्या वाहनांवर कारवाईची मोहीम राबवत ४६ वाहनांवर दंडात्मक कारवाई केली. या कारवाईतून एकूण ३७ हजार ५०० रुपयांचा दंड वसूल केला.