वडजमध्ये दोन बाल विवाह रोखण्यात प्रशासनाला यश

जुन्नर, ता. १० : वडज (ता.जुन्नर) येथे आज मंगळवारी (ता.१०) होणारे दोन बालविवाह रोखण्यात प्रशासनाला यश मिळाले आहे. याबाबत चाइल्ड लाईनकडून माहिती प्राप्त झाली.
जुन्नर पोलिसांच्या मदतीने तसेच जिल्हा महिला बाल विकास अधिकारी पुणे यांच्या मार्गदर्शनाखाली तालुका स्तरीय संरक्षण अधिकारी ए.के. साळुंखे, तालुका स्तरीय बालविवाह प्रतिबंधक अधिकारी एन.डी.कोल्हे विवाहस्थळी पोचले. विवाह स्थळी एकाच मंडपात दोन मुलींचे बाल विवाह होत असल्याचे आढळून आले.
यावेळी बालविवाहासाठी सुमारे ५०० हुन अधिक लोक उपस्थित असल्याचे निदर्शनास आले. हे बाल विवाह होण्यापूर्वी थांबवण्यात येऊन जुन्नर पोलिस ठाण्यात दोनही मुला-मुलीच्या पालकांकडून मुलीचे अठरा वर्षे पूर्ण झाल्याखेरीज त्यांचे विवाह करणार नाही, असा जबाब लिहून घेण्यात आला.
या कार्यवाहीसाठी जुन्नरचे पोलिस निरीक्षक विकास जाधव, उपनिरीक्षक पवार, तालुका स्तरीय संरक्षण अधिकारी ए.के.साळुंखे,बाल विवाह प्रतिबंध अधिकारी तथा ग्रामसेवक ग्रामपंचायत वडज एन.डी.कोल्हे, पोलिस पाटील वंदना शेळके व इतर पोलिस कर्मचारी यांच्या एकत्रित प्रयत्नाने मुलींचे बालविवाह रोखण्यात प्रशासनाला यश आल्याचे साळुंखे यांनी सांगितले.