आपटाळे अपघातप्रकरणी टेम्पो चालकाला अटक

जुन्नर, ता. ४ : आपटाळे-जुन्नर रस्त्यावरील अपघातानंतर पळून गेलेल्या टेम्पो चालकास जुन्नर पोलिसांनी शुक्रवारी (ता. ३) मध्यरात्री ताब्यात घेऊन अटक केली.
या अपघातात शिक्षक नेते भास्कर पानसरे यांचा जागीच मृत्यू झाला होता. पानसरे हे बेलसर (ता. जुन्नर) येथे धार्मिक कार्यक्रमास गेले होते. तेथून मोटारसायकलवरून परत येत असताना बेजवाटेजवळ सकाळी ११ वाजण्याच्या सुमारास अज्ञात वाहनाने त्यांना धडक दिली होती. त्यानंतर अपघाताची खबर न देता चालक पळून गेला होता. याबाबत कैलास दत्तात्रेय पानसरे (रा. तांबे, ता. जुन्नर) यांनी फिर्याद दिली होती. सुलतान रसूल शेख (रा. तांबे), असे अटक केलेल्या टेम्पो चालकाचे नाव असून, तो जुन्नरहून आपटाळेकडे जात होता. तर, पानसरे हे जुन्नरकडे येत होते, अशी माहिती पोलिस निरीक्षक विकास जाधव यांनी दिली. याबाबतचा अधिक तपास पोलिस उपनिरीक्षक दिलीप पवार हे करत आहेत.