जुन्नरला संविधान कार्यशाळेस प्रतिसाद

जुन्नर, ता.८: पुणे येथील युवक क्रांती दल व झेप फौंडेशनच्या विद्यमाने जुन्नर येथील परिवर्तन ॲकॅडमीच्या वतीने आयोजित ‘संविधान परिभाषा आणि प्रचार’ या विषयावरील कार्यशाळेस विविध स्पर्धा परीक्षांचा अभ्यास करणारे विद्यार्थी व युवकांचा उत्स्फूर्त प्रतिसाद मिळाला.
राज्यघटनेच्या प्रस्तावनेचे सामुहिक वाचन करून कार्यशाळेस प्रारंभ करण्यात आला. यावेळी झेप फौंडेशनचे प्रसाद झावरे, एसएफआयचे विलास साबळे, आदिवासी प्रकल्प समितीचे सदस्य दत्ता गवारी, गृहपाल निमघिरे, सरपंच बुधाजी गवारी, परिवर्तन ॲकॅडमीचे संचालक गणपत घोडे, संजय साबळे उपस्थित होते.ॲकॅडमीचे संचालक विश्वनाथ निगळे यांनी प्रास्ताविक केले. यावेळी संविधान निर्मितीमधील स्त्रियांचा सहभाग आणि कार्ये याबाबत युक्रांदच्या पुणे शहर उपाध्यक्षा प्रा. नीलम पंडित यांनी माहिती दिली.
संविधानाच्या लोक शिक्षणातून भारतीय व्यवस्था अधिक बळकट होणार असल्याचे युवक क्रांती दलाचे राज्य कार्यवाहक संदीप बर्वे यांनी सांगितले.