सणसवाडीत वीस लाखांचा गुटखा जप्त

सणसवाडी, ता. १८ : येथील शिवम सोसायटीमधील एका खोलीतून तब्बल वीस लाखांचा गुटखा जप्त करीत शिक्रापूर (ता. शिरूर) पोलिस व स्थानिक गुन्हे शाखेने एकत्रित मोठी कारवाई केली. त्यात गुटखा माफिया बलिंदरकुमार राजकिशोर यादव याला अटक केली आहे.
याबाबत शिक्रापूर पोलिसांनी माहितीनुसार सणसवाडी (ता. शिरूर) येथील शिवम सोसायटीमधील एका खोलीत लाखो रुपयांचा गुटखा व बेकायदीर असलेला पान मसाला ठेवल्याची माहिती स्थानिक गुन्हे शाखेचे पोलिस निरीक्षक अविनाश शिळीमकर यांना त्यांच्या गुप्त बातमीदारांकडून दोन दिवसांपूर्वी मिळाली. त्यानंतर स्थानिक गुन्हे शाखेचे पोलिस हवालदार तुषार पंदारे, जनार्दन शेळके, संजू जाधव, सागर धुमाळ, शिक्रापूरचे पोलिस उपनिरीक्षक जितेंद्र पानसरे, पोलिस हवालदार अमोल दांडगे, श्रीमंत होनमाने यांनी शिवम सोसायटीतील तळमजल्यावर असलेल्या खोलीत जाऊन पाहणी केली. त्यावेळी या खोलीत एक व्यक्ती आणि गुटखा व पान मसाल्याचा साठा मिळून आला. पोलिसांनी या व्यक्तीला ताब्यात घेत खोलीतील सर्व
गुटखा व पानमसाला ताब्यात घेतला. त्याचे बाजारमूल्य तब्बल वीस लाख रुपयांचे आहे.
याप्रकरणी स्थानिक गुन्हे शाखेचे पोलिस हवालदार जनार्दन सुरेश शेळके (रा. शिरूर) यांनी शिक्रापूर पोलिस ठाण्यात फिर्याद दिली. त्यानुसार शिक्रापूर पोलिसांनी बलिंदरकुमार राजकिशोर यादव (वय ३२, सध्या रा. सणसवाडी, मूळ रा. पलस, पो. बासभिगा, ता. मसोडी, जि. पाटना, बिहार) याच्याविरुद्ध गुन्हा दाखल केला आहे.

बजरंगवाडी निसटली
बेकायदा गुटखा विकल्या जात असल्याने सणसवाडीत स्थानिक गुन्हे शाखेने पुढे होऊन कारवाई केली खरी, मात्र अशाच पद्धतीने शिक्रापुरातील बजरंगवाडीतील एका धान्य दुकानातून गुटखा होलसेल विकला जात असल्याचे साऱ्या शिक्रापूरवासियांना माहिती असताना स्थानिक गुन्हे शाखेने ही निवडक कारवाई कशी केली? हाच प्रश्न शिक्रापूरकर विचारत आहेत.