लघुशंकेसाठी थांबलेल्या व्यावसायिकास लुटले

कुरुळी, ता. ३ : बांधकाम प्रकल्पावरून मोटारीत बसून घरी जात असताना चाकण औद्योगिक वसाहतीत महाळुंगे (ता. खेड) येथे रस्त्यात लघुशंकेसाठी थांबलेल्या एका बांधकाम व्यावसायिकाला तीन चोरट्यांनी लुटले.
याबाबत शुभम साहेबराव कड (वय २४, रा. चाकण) यांनी महाळुंगे पोलिसांत तक्रार दिली. त्यानुसार दुचाकीवरील तीन अज्ञात चोरट्यांच्या विरोधात महाळुंगे पोलिसांनी गुन्हा दाखल केला. फिर्यादी कड हे बांधकाम व्यावसायिक आहेत. सध्या त्यांचा खेड तालुक्‍यातील खालुंब्रे गावात बांधकाम प्रकल्प सुरू आहे. तेथे भेट देऊन ते पुन्हा आपल्या घरी चालले होते. त्यावेळी चाकण एमआयडीसी भागात महाळुंगे गावच्या हद्दीत एका कंपनीच्या कंपाउंड गेटजवळ ते लघुशंकेसाठी थांबले. त्यावेळी दुचाकीवरून आलेल्या तीन चोरट्यांनी त्यांच्या गळ्यातील सोन्याची चैन, हातातील घड्याळ व मनगटात असलेले चार तोळ्याचे सोन्याचे ब्रेसलेट, असा एकूण लाखो रुपयांचा ऐवज लुटला. याबाब महाळुंगे पोलिसांत मंगळवारी (ता. ३१) गुन्हा दाखल केला.