खेडच्या दक्षिण भागात पावसाची जोरदार हजेरी

कुरुळी, ता. १० : कुरुळी (ता. खेड) परिसरात शुक्रवारी (ता. १०) सोसाट्याचा वारा व मेघगर्जनेसह पावसाने जोरदार हजेरी लावली. त्यामुळे काही क्षणातच परिसरात पाणीच पाणी झाले.
कुरुळी, निघोजे, म्हाळुंगे, मोई, चिंबळी येथे जोरदार पाऊस झाला. त्यामुळे शेतकऱ्यांच्या चेहऱ्यावर आनंदाचे वातावरण आहे. गेल्या अनेक दिवसांपासून शेतकरी वळवाच्या पावसाच्या प्रतीक्षेत होते. शुक्रवारी सायंकाळी वरुणराजाने जोरदार हजेरी लावली. त्यामुळे पेरणी पूर्व मशागतीच्या कामाचा मार्ग मोकळा झाला आहे.
उन्हाळी बाजरी व भुईमूग पिकाची काढणी अंतिम टप्प्यात आली आहे. पावसाने लावलेल्या हजेरीने बाजरी काढणी, मळणी, भुईमूग काढणी वाळत घातलेल्या शेंगा पावसापासून वाचविण्यात शेतकऱ्यांची धावपळ झाली आहे. जनावरांचा वाळलेला चारा व शेणाच्या गोवऱ्या पावसाने भिजू नये, यासाठी झाकण्याची लगबग झाली. प्रचंड उकाड्याने हैराण झालेल्या नागरिकांना मध्ये पावसाच्या आगमनाने समाधान व्यक्त केली आहे.