कुंजीरवाडीत व्यावसायिकाला खंडणी मागणाऱ्यांवर गुन्हा

लोणी काळभोर, ता. २५: कुंजीरवाडी (ता. हवेली) येथील एका व्यावसायिकाच्या मानेवर कोयता लावून खंडणी मागणाऱ्या सात जणांवर लोणी काळभोर पोलिस ठाण्यात गुन्हा दाखल करण्यात आला आहे. ही घटना मंगळवारी (ता. २४ ) रात्री साडे आठ वाजण्याच्या सुमारास नायगाव चौक, कुंजीरवाडी येथे घडली आहे.
व्यावसायिक अविनाश दादासाहेब न्हावले (वय- २७, रा. वायकरवस्ती, सोरतापवाडी, ता. हवेली) यांनी दिलेल्या फिर्यादीनुसार किरण गावडे, शुभम धुमाळ, वसंत लोंढे, योगेश लोंढे, गणेश म्हाळनकर व आणखी दोघेजणांवर गुन्हा दाखल झाला आहे. वरिष्ठ पोलिस निरीक्षक राजेंद्र मोकाशी यांनी दिलेल्या माहितीनुसार, किरण गावडे हा त्याचे मित्र शुभम धुमाळ, वसंत लोंढे, योगेश लोंढे, गणेश म्हाळनकर यांना घेऊन अविनाश न्हावले यांचे दूध डेअरी वर आला. डेअरीतील साहित्यांची नासधूस करून न्हावले यांच्या मानेवर कोयता ठेवला व व्यवसाय करण्यासाठी दरमहा २ हजार रुपयांची खंडणीची मागणी केली. तसेच खंडणी न दिल्यास जिवंत ठेवणार नाही अशी धमकी दिली. पुढील तपास पोलिस उपनिरिक्षक अमित गोरे करीत आहे.