कदमवाकवस्ती येथे साडेसहा लाखांची चोरी

लोणी काळभोर, ता. १ : घरी कोणीही नसल्याची संधी साधून चोरट्यांनी रोकड व दागिन्यांसह जवळपास साडेसहा लाख रुपयांचा मुद्देमाल लंपास केला. ही घटना कदमवाकवस्ती (ता. हवेली) ग्रामपंचायत हद्दीतील संभाजीनगर परिसरात शुक्रवारी (ता. १) सकाळी अकरा वाजण्याच्या सुमारास घडली.

याप्रकरणी सुहास सुधाकर बोरकर (वय ४५, रा. श्री कॉम्प्लेक्स सोसायटी, संभाजीनगर, कदमवाकवस्ती, ता. हवेली मूळ रा.बोरकरवस्ती) यांनी लोणी काळभोर पोलिस ठाण्यात फिर्याद दिली आहे.

पोलिसांनी दिलेल्या माहितीनुसार, सुहास बोरकर यांच्या पत्नी नीता या घरी आल्या असता घराचा दरवाजा उघडून घराची पाहणी केली असता बेडरूम मधील कपाटामधील व बेडमधील सामान अस्ताव्यस्त पडल्याचे दिसून आले. बेडमध्ये ठेवलेले सोन्याचे दागिने व रोख रक्कम दिसून आली नाही. याची किंमत ६ लाख ६४ हजार ७५० रुपये आहे.