शिरूर मतदार संघासाठी तीन कोटींचा निधी मंजूर

मंचर, ता. ९ : शिरूर लोकसभा मतदार संघातील स्थापन झालेल्या मंचर नगरपंचायतीसह आळंदी, चाकण, राजगुरुनगर, जुन्नर व शिरूर नगरपरिषदेतील विविध विकास कामांसाठी तीन कोटी रुपयांचा निधी नगरविकास मंत्री एकनाथ शिंदे यांच्या माध्यमातून मंजूर झाला आहे, अशी माहिती माजी खासदार शिवाजीराव आढळराव पाटील यांनी दिली.
मंजूर निधी पुढीलप्रमाणे : मंचर येथे भाजीपाला बाजार तळाजवळ उद्यानाची निर्मिती (एक कोटी रुपये), आळंदी-नगरपरिषद शाळा क्र.४ येथे उद्यान विकसित करणे- ६० लाख रुपये, चाकण-नगरपरिषद हद्दीतील चक्रेश्वर मंदिर स्मशानभूमीलगत संरक्षक भिंत बांधकाम व सौर ऊर्जा युनिट उभारणे- ३५ लाख रुपये, राजगुरुनगर-स्मशानभूमी परिसर सुधारणा करणे- ३० लाख रुपये, जुन्नर-खालचा माळीवाडा ते उत्तरेश्वर मंदिरापर्यंत रस्ता डांबरीकरण करणे- २५ लाख रुपये व शिरूर नगर परिषदेसाठी विद्युत विभाग व अन्य आनुषंगिक कामांसाठी हायड्रोलिक शिडी असणारे बहुपयोगी वाहन उपलब्ध करणे- २५ लाख रुपये.