आंबेगावात वादळी वाऱ्यासह पावसाची हजेरी

महाळुंगे पडवळ, ता. १ : आंबेगाव तालुक्यातील कळंब, लौकी, चांडोली बुद्रुक, नांदूर आदी गावात वादळी वाऱ्यासह १५ मिनिटे पावसाने हजेरी लावली. उकाड्यापासून दिलासा मिळाला असला तरी शेतकऱ्यांची मोठ्या प्रमाणात तारांबळ उडाली आहे.
सायंकाळी ५ वाजता वादळीवाऱ्यासह पावसाला सुरुवात झाली. शेताच्या कडेला शेतकऱ्यांनी कांद्याच्या अरणी लावून कांदा साठवून ठेवला होता. पावसामुळे कांदा अरणीवर तसेच बाजरीच्या कणसावर झाकण टाकण्यासाठी शेतकऱ्यांची धावपळ झाली. वाऱ्यामुळे आंबा बागायतदारांना फटका बसला आहे. तसेच पिकांचे नुकसान झाल्यामुळे शेतकरी हवालदिल झाला आहे. सध्या तापमानाचा पारा वाढला आहे. उष्णतेने अंगाची काहिली होत आहे. मात्र, आज सायंकाळी अचानक पावसाच्या सरी पडल्याने वातावरणात थोडासा गारवा निर्माण झाला असून उकाड्याने त्रस्त नागरिकांनाही थोडा दिलासा मिळाला आहे.