पुरंदरमध्ये ज्वारी तरारली, भाजीपाला पिकांचे नुकसान

माळशिरस, ता. २४ : पुरंदर तालुक्याच्या पूर्व भागातील माळशिरस परिसरामध्ये गुरुवारी (ता. २४) झालेल्या जोराच्या पावसाने ज्वारीची पिके तरारली, मात्र भाजीपाला पिकांना मोठा फटका बसला आहे.
माळशिरससह पोंढे, राजुरी, रिसे, पिसे, नायगाव, पिसर्वे, टेकवडी या परिसरात गुरुवारी सायंकाळी सहानंतर जोरदार पाऊस झाला. मध्यरात्रीच्या सुमारास या भागात जोराच्या पावसाने पुन्हा हजेरी लावली. त्यामुळे ओढे, नाले पुन्हा एकदा पाण्याने चांगल्या पद्धतीने प्रवाहित झाले. बंधाऱ्यांची कमी झालेली पाण्याची पातळी पूर्ववत झाली. पावसाबरोबर जोराच्या वाऱ्याचे प्रमाण असल्याने ज्वारीची पिके थोडीफार जमिनीकडे झुकली, मात्र ज्वारी पिकांसाठी पाऊस वरदान ठरला. ‘आगाप स्वरूपात असलेल्या ज्वारीची पिके या पावसाने बंदा रुपया येतील,’ असे आता ज्वारी उत्पादक शेतकरी बोलू लागले आहेत. या जोरदार पावसामुळे मेथी, कोथिंबीर पिकाला मोठा फटका बसला आहे. पावसाच्या पाण्याने वाफे भरगच्च भरल्याने भाजीपाला पिके सडण्याची भीती भाजीपाला उत्पादक शेतकऱ्यांना वाटू लागली आहे. फूल उत्पादक शेतकऱ्यांना देखील या पावसाने फटका बसण्याची शक्यता असून, पावसाने फुले खराब होण्याची चिन्हे दिसू लागली आहेत