खेडशिवापूर टोलनाक्यावर तब्बल दीड टन गोमांस जप्त

खेडशिवापूर, ता. २७ : पुणे-सातारा महामार्गावरील खेडशिवापूर टोलनाका परिसरात राजगड पोलिसांनी मोठी कारवाई करत बोलेरो पिकअपमधून तब्बल पंधराशे किलो गोवंश सदृश मांस जप्त केले आहे. या प्रकरणी पोलिस राजगड पोलिस ठाण्याचे शिपाई अभिजित छगन इंगळे यांनी शासकीय फिर्याद दिली असून, पिकअप चालक दत्तात्रेय सोपान सोनवळकर (वय ४०, रा. दुधेबाची, ता. फलटण) याच्यावर गुन्हा दाखल केला आहे.
पोलिसांनी दिलेल्या माहितीनुसार, गोपनीय बातमीदारांमार्फत राजगड पोलिसांना मिळालेल्या माहितीनुसार एक पिकअप क्र. एम.एच. ४३ सी.के. ५३०९ मधून गोमांस सारखा माल घेऊन पुणे सातारा महामार्गावरून मुंबईकडे निघाली आहे. राजगड पोलिसांनी तातडीने खेड शिवापूर टोलनाक्यावर सापळा रचत शनिवारी (ता. २५) रोजी सकाळी सात वाजण्याच्या सुमारास ही पिकअप अडवून तपास केला असता त्यामधून बारामती येथील बीफ मार्केटमधून बेकायदेशीरपणे कत्तल केलेल्या जनावरांचे अवयव वाहतूक होत असल्याचे उघड झाले.
या कारवाईत राजगड पोलिसांनी या प्रकरणी पाच लाख रुपये किंमतीची बोलेरो पिकअप जीप आणि दोन लाख २५ हजार रुपये किमतीचे अंदाजे दीड टन गोवंश सदृश मांस असा एकूण ७ लाख २५ हजार रुपयांचा मुद्देमाल जप्त केला आहे.
याप्रकरणी महाराष्ट्र प्राणी संरक्षण अधिनियम कायद्याअंतर्गत राजगड पोलिस ठाण्यात गुन्हा दाखल केला असून पुढील तपास पोलिस हवालदार तळपे करत आहेत.