संतराज महाराज दिंडीची पंढरपूर येथे नगरप्रदक्षिणा

न्हावरे, ता. ११ : आषाढी एकादशी सोहळ्यानिमित्त संतराज महाराज पायी दिंडी सोहळ्याची पंढरपूर येथे नगरप्रदक्षिणा हरिनामाच्या गजरात, टाळ मृदंगाच्या तालावर हजारो भाविकांसमवेत भक्तिमय वातावरणात पार पडली.
शिरूर, दौंड तालुक्यातील नागरिकांचे श्रद्धास्थान असलेल्या श्री क्षेत्र संगम वाळकी रांजणगाव सांडस बेट येथील संतराज महाराज पायी दिंडी सोहळा आषाढी एकादशी सोहळ्यानिमित्त शनिवार (ता. ९) पंढरपूर नगरीत आगमन झाले होते. आज एकादशीनिमित्त पादुकांचे पूजन श्री संतराज महाराज देवस्थानचे अध्यक्ष कीर्तनकार सुरेशमहाराज साठे यांच्या हस्ते विधिवत पूजा करून मुख्य नगरप्रदक्षिणा सोहळ्यास सुरुवात झाली. भक्त पुंडलिक महाराजांचे दर्शन घेऊन थेट विठ्ठल मंदिराला प्रदक्षिणा करून या दिंडीचे आगमन संतराज महाराज धर्मशाळेत झाले. वाटेत ठिकठिकाणी भक्तजनांनी या दिंडीचे हरिनामाच्या गजरात स्वागत केले. यावेळी उपस्थित भक्तजनांना फराळाचेही वाटप करण्यात आले.
या दिंडी सोहळ्यात पुणे जिल्हा तसेच नगर जिल्ह्यातील भाविक जन सहभागी होत असतात.

01404