बिबट्याच्या हल्ल्यात थोरांदळ्यात तरुण जखमी

निरगुडसर, ता. २ : थोरांदळे (ता. आंबेगाव) येथे शनिवारी (ता. १) रात्री दुचाकीवरून घरी चाललेला तरुण बिबट्याने केलेल्या हल्ल्यात जखमी झाला.
थोरांदळे येथील अमोल अरुण गुंजाळ हा तरुण शनिवारी रात्री आठ वाजण्याच्या सुमारास दुचाकीवरून घरी चालला होता. त्यावेळी वेस्टर्न कंपनीच्या परिसरात बिबट्याने त्याच्यावर हल्ला केला. त्यामुळे त्याची दुचाकी घसरली. त्यात बिबट्याचे दातही त्याला लागले. दुचाकीवरून घसरल्याने हात व पायाला जखमा झाल्या आहेत. याबाबत माहिती मिळताच वनरक्षक बी. एच. पोत्रे, वनसेवक महेश टेमगिरे यांनी त्यास मंचर उपजिल्हा ग्रामीण रुग्णालयात दाखल केले. लस दिल्यानंतर त्याला घरी सोडण्यात आले.