पिंपरी बुद्रुक परिसरातील नळपाणी पुरवठा योजनेस दीड कोटी

नीरा नरसिंहपूर, ता. १ ः पिंपरी बुद्रुक (ता. इंदापूर) गावासाठी जल जीवन मिशन अंतर्गत नळपाणी पुरवठा योजनेला प्रशासकीय मान्यता मिळाली आहे. त्यासाठी एक कोटी ७० लाखांचा निधी मंजूर करण्यात आला आहे. तत्कालीन पालकमंत्री अजित पवार व माजी राज्यमंत्री दत्तात्रेय भरणे यांच्या प्रयत्नातून सदर योजना मंजूर झाली आहे.
योजनेला जिल्हा पाणी व स्वच्छता मिशन स्तरावरील जिल्हाधिकारी यांच्या अध्यक्षतेखालील समितीने मान्यता दिल्याने प्रशासकीय मान्यतेचा आदेश निर्गमित करण्यात आला आहे. केंद्र शासनाच्या जल जीवन मिशनच्या पाणी पुरवठा योजनेच्या देखभाल दुरुस्तीकरिता योजनेच्या किमतीच्या १० टक्के /५ टक्के रक्कम लोकवर्गणीच्या स्वरूपात ग्रामपंचायतीकडे ठेवणे आवश्यक राहील. सदर योजनेतून प्रत्येक घरास नळजोडणी देणे आवश्यक आहे. तसेच स्वखर्चाने १०० टक्के घरगुती नळजोडण्या व जलमापक बसविणे बंधनकारक आहे. तसेच संबंधित ग्रामपंचायतीने किमान ८० टक्के नळजोडणी धारकाकडून स्व:खर्चाने मिटर जोडणी घेण्याबाबत हमीपत्र घेण्यात यावे.
पिंपरी बुद्रुक ग्रामपंचायतीच्या मंजूर नवीन पाणीपुरवठा योजनेमुळे गावाच्या पिण्याच्या पाण्याचा प्रश्न निकाली काढण्यात आला आहे. तत्कालीन उपमुख्यमंत्री अजित पवार व माजी राज्यमंत्री दत्तात्रेय भरणे यांच्या विशेष प्रयत्नातून सदर योजना मंजूर करण्यात आली असल्याचे माजी सरपंच श्रीकांत बोडके यांनी सांगितले.