फलटण येथील घटनेचा तीव्र निषेध

फुलवडे, ता. २६ ः फलटण (जि. सातारा) येथील उपजिल्हा रुग्णालयात कार्यरत महिला वैद्यकीय अधिकाऱ्याची झालेली संशयास्पद आत्महत्या ही सर्व वैद्यकीय अधिकाऱ्यांसाठी अत्यंत दुःखद व धक्कादायक घटना आहे. मृत्यूपूर्वी या महिला अधिकाऱ्याने हातावर लिहिलेल्या नोंदीनुसार, दोन पोलिस अधिकाऱ्यांकडून लैंगिक अत्याचार आणि दीर्घकालीन छळ झाल्याचे गंभीर आरोप समोर आले आहेत. या घटनेचा महाराष्ट्र राज्य राजपत्रित वैद्यकीय अधिकारी महासंघ तीव्र निषेध करत आहे, अशी माहिती राज्याध्यक्ष डॉ. अरूण कोळी यांनी दिली.
या प्रकरणात स्थानिक पोलिस यंत्रणेवर थेट आरोप असल्याने या प्रकरणाची चौकशी स्वतंत्र विशेष तपास पथक किंवा सीआयडीकडे सोपवावी. कायद्यातील तरतुदीनुसार संबंधित आरोपींवर आत्महत्येस प्रवृत्त करणे (कलम १०८) आणि लैंगिक गुन्हे (कलम ६३, ६४ (२)) यांसारख्या गंभीर आरोपांसाठी कठोर कारवाई करावी. तसेच हे प्रकरण लैंगिक गुन्ह्यांशी संबंधित असल्याने, पीडितेची ओळख (कलम ७२ नुसार) कुठल्याही माध्यमातून उघड होणार नाही याची सक्त खबरदारी घ्यावी. तसेच, प्राथमिक आरोग्य केंद्रे व ग्रामीण रुग्णालय स्तरावर कार्यरत वैद्यकीय अधिकारी यांचे न्यायवैद्यक कायद्याबाबत नियमित प्रशिक्षण आयोजित करण्यात यावे, अशा विविध मागण्या महासंघातर्फे निवेदनात करण्यात आल्या आहेत.